adalet.az header logo
  • Bakı 27°C
  • USD 1.7
25 Iyun 2022 15:06
196
DÜNYA

Rusiya ilk dəfə Ukraynaya Belarusdan zərbə endirdi

“Rusiya strateji aviasiyası ilk dəfə Ukraynaya birbaşa Belarus ərazisindən hava zərbəsi endirdi, bu, Minski birbaşa iştirakçı kimi müharibəyə cəlb etmək üçün təxribatın bir hissəsi ola bilər”.

Bu barədə Ukrayna Müdafiə Nazirliyinin Baş Kəşfiyyat İdarəsi məlumat yayıb.

Qeyd olunur ki, kütləvi raket zərbəsi iyunun 25-nə keçən gecə həyata keçirilib. Zərbələr üçün X-22 raketlərini buraxan altı “Tu-22M3” strateji bombardmançıdan istifadə edilib.

Baş Kəşfiyyat İdarəsinin məlumatına görə, Rusiya təyyarələri Kaluqa vilayətinin Şaykovka hava limanından havaya qalxıb, daha sonra onun ərazisindən və Smolensk vilayətindən keçərək Belarusun hava məkanına daxil olub. Raketlər Ukrayna ilə sərhəddən 50-60 km aralıda, Mozır yaxınlığında yerləşən Petrikov ətrafından buraxılıb. Atışdan sonra bombardmançılar Şaykovkaya qayıdıblar.

Raketlər Kiyev, Sumskaya və Çerniqov vilayətləri üzərindən uçub.

“Bu, birbaşa Belarus ərazisindən Ukraynaya hava hücumu ilə bağlı ilk hadisədir. Kəşfiyyatçıların fikrincə, bu, Belarusu Ukraynaya qarşı birbaşa müharibəyə daha da cəlb etmək məqsədilə Rusiya Federasiyasının genişmiqyaslı təxribatı idi”, - deyə Baş Kəşfiyyat İdarəsindən bildirilib.