Bolqarıstan hökuməti Bolqarıstan, Azərbaycan, Gürcüstan və Türkiyənin energetika nazirlikləri arasında "yaşıl" elektrik enerjisinin ötürülməsi və ticarəti sahəsində əməkdaşlığa dair anlaşma memorandumunun layihəsini təsdiqləyib.

Adalet.az xəbər verir ki, bu barədə ölkənin Nazirlər Şurası məlumat yayıb.

Memorandum tərəfləri “yaşıl” elektrik enerjisi sahəsində birgə layihələrin həyata keçirilməsinə, zəruri infrastrukturun qurulmasına, bilik və texnologiyanın fəal mübadiləsinə kömək etmək, qarşılıqlı faydalı təşəbbüsləri təşviq etmək barədə razılığa gəliblər.

Dörd ölkənin energetika nazirlikləri elektrik enerjisinin ötürülməsi və ticarət potensialının genişləndirilməsi üçün sistemlərarası əlaqənin modernləşdirilməsi və birgə investisiya layihələrinin həyata keçirilməsi imkanlarının araşdırılmasında daha güclü dövlət-özəl sektor tərəfdaşlığını təşviq edəcəklər. Memorandum layihəsi enerji infrastrukturunun təkmilləşdirilməsini və bərpa olunan enerji mənbələrindən istifadənin artırılmasını nəzərdə tutur.

Tərəflərdən biri memorandumu ləğv etmək qərarına gəlməzsə, saziş növbəti avtomatik uzadılma imkanı ilə üç il müddətinə bağlanacaq.