Əbülfət MƏDƏTOĞLU: Allahın axır sözü...
"Bir qadına..." silsiləsindən
Sənli anlarımda xoşbəxt bir bəndə
Sənsiz anlarımda unudulmuş, tək...
Məni məndən yaxşı duyursan Sən də -
Əl uzat , ömrünün bir küncünə çək...
Səpmə ortalığa ağılı, hissi
Daş daşı yesə də , qum ömrü qalır...
Qınaq ünvanına çevirib bizi -
Kədər içimizdə lövbərin salır.
Sakitcə əriyir qətiyət, inad
Boşalır, süstləşir əl-qolumuzda...
Gör necə yad olur bizə bu həyat -
Sovrulur , süprülür sağ-solumuz da..
Köhnə tərəzinin ağır gözü tək
Ürək də titrəyir bu halımızda...
Deyəsən Allahın axır sözü tək -
Ayılın! - səslənir qulağımızda...