Əbülfət Mədətoğlu: Ömrümdəki bəlkə
"Bir qadına...Ⅶ silsiləsindən
Mən dəqiq bilirəm ömür dəndi, dən -
Onu vaxt üyüdür, zaman ələyir...
Külək yelkənini açanda bəzən -
Boş xırman yerini saman bələyir...
Könül dinləməyə fürsət düşəndə -
Bir göz qırpımında vaxt buxarlanır...
İçimdə tərəddid ... bil didişəndə -
Gözümdən səssizcə... o buxar damır...
Kədər yol vərəqi, qəm ezamiyə
Başlayır ürəyin bayatı turu...
Nişançı barmağı gedir tətiyə -
Saralır adamın içinin nuru...
Bəlkə də xoş deyil sənə bu yazı
Hətta yazılması günahdı bəlkə...
Xəyaldı ömrün sənlə bəyazı -
Ya da sevgimizdə sınaqdı ... bəlkə!