Əbülfət Mədətoğlu: Ümid işartısı
"Bir qadına..." silsiləsindən
Səninlə açılan hər səhərimdə
Ümid tellərini darayır yana...
Boğulur bir küncdə qəm - qəhərim də -
Təklik də az qalır içindən yana...
Səpir qızartısın gözümdəki dan
Yaşanan anların küçələrinə...
Sənsiz səhərlərdə bulud olur can -
Yığır damcıların küçə əlinə...
Səssiz avazıyır başımdakı çən
Yükü də azalır , sanki qəlbimin...
Necə edirsənsə , bu anımda sən -
Ölçüsü dəyişir bil, qəlibimin!..
Ömrün hər çağını bəzəyən ümid
Coşdurur könlümün fərəhini də!..
Səhəri imkan tap, gəl özün kirit -
Unutma gecəyə gərəyini də...