Cənab Prezidentin sərəncamı ilə Füzulidən Şuşaya 101 kilometr uzunluğunda yol inşa edilir. «Azəravtoyol» bütün gücünü bu yolun tikintisinə sərf edir ki, çəkilişi tezliklə başa çatdıra bilsinlər. Və yəqin ki, bu yolun açılmasına çox qalmayıb.
Gorusdan Əsgərana təxminən 90-100 kilometrdi. Sülhməramlılar ermənilərin İrəvandan Xankəndinə, Əsgərana, Ağdərəyə, Martuniyə oynaya-oynaya gəlib-getmələri üçün təhlükəsizliyi təmin ediblər və artıq ermənilər İrəvandan Əsgərana olan yolu su yoluna döndəriblər. Etirazımız yoxdu.
Amma Ağdamdan Şuşaya 37 kilometr, Laçına isə 73 kilometrdi. Özü də rahat yoldu.
Və yaxud Tərtərdən Kəlbəcərə Ağdərə yolu ilə təxminən 80 kilometrdi, özü də rahat yoldu.
Biz niyə Kəlbəcərə Toğanadan keçməklə Murovun o çətin və ağır yolları ilə gedib-gəlməliyik?
Niyə sülhməramlılar ermənilərin təhlükəsizliyinə təminat verdikləri kimi, bizim də öz torpağımızda sərbəst hərəkət etməyimiz üçün təminat vermirlər?
Çətin sualdı, amma cavabı və həlli o qədər də çətin deyil.