Rüşvət və korrupsiyaya görə icra başçıları həbs olunur, nazir və nazir müavinləri həbs olunur. Klinika və xəstəxanaların baş həkimləri «qara maskalılar»a qonaq olur və sair və ilaxır. Artıq iki ildir ki, biz bunların şahidiyik və ölkədə korrupsiyaya qarşı böyük və ciddi bir mübarizə aparılır.
Amma bu, məmurlara öhd olmur. Gözləri çıxan qardaşlardan öyrənmək istəmirlər. Elə bilirlər ki, bunların gözləri aladı. Və elə bilirlər ki, oturduqları kreslolar onları toxunulmaz edir.
Artıq iki ildir ki, hələ bir az da çox, mətbuatda Şəmkir rayonunun sabiq icra hakimiyyəti başçısı Alimpaşa Məmmədovun əməllərindən yazılar gedir, özü də faktlarla. Amma bu ona vız gəlibmiş. İşində dönüş yaratmaq, elədiyi günahları yumaq, səhvlərini düzəltmək əvəzinə bir az da bataqlığa girirmiş. Və ən dəhşətlisi də odur ki, özü cəhənnəm, övladını da işlətdiyi cinayət əməllərinə şərik edirmiş.
Yəqin ki, kimə və yaxud kimlərəsə çox arxayınmış.
Cavanlıqda dəniz kənarında bir davanın şahidi oldum. İki nəfər bir oğlanı yerə yıxıb təpikləyirdi. O da bağırırdı:
- Vəli, qoyma, məni öldürürlər!
Ən maraqlısı o idi ki, onun güvəndiyi Vəlini beş-on metr o tərəfdə üç-dörd nəfər nə təhər çırpırdısa Vəlinin kömək istəməyə də heyi qalmamışdı. Düzdür, dostlarla tökülüb aralaşdıra bildik, yəni döyülənləri əllərindən aldıq. Amma o qədər güldüm ki!
- Vəli, qoyma, məni öldürürlər!
Ayə, Vəli var? Yoxdu eyy, Vəli səndən pis gündədi.
İndi Alimpaşanın və alimpaşaların arxalandıqları vəlilər onlardan da ağır gündədi.
Qonum-qonşudan bir papaq alın, qoyun qabağınıza, nə qədər gec deyil, fikirləşin.