Məhşur rep ustası Hüseyn Dərya yaşasaydı bu gün 46 yaşını qeyd edəcəkdi.  

 Muradov Hüseyn Cahangir oğlu 1975-ci il 29 iyunda Bakının Bakıxanov qəsəbəsində dünyaya göz açıb.

Adalet.az beş övladlı ailənin sonbeşiyi olan Hüseyn ilk təhsilini Nərimanov rayonunda yerləşən 4 saylı fars təmayüllü məktəbdə alıb. Orta məktəbi bitirdikdən sonra Bakı Dövlət Universitetinin şərqşünaslıq fakültəsinə daxil olub. Hüseynin tələbəlik illəri Qarabağ müharibəsi dövrünə təsadüf etdiyindən, təhsilini yarımçıq qoyaraq könüllü cəbhəyə yollanır. Dörd il 4 ay hərbi xidmət keçdikdən sonra Bakıya-evinə qayıdır.

Hərbi xidmətdən qayıtdıqdan sonra isə Dərya təxəllüsü ilə rep ifaçısı kimi öz musiqi karyerasına başlayır. Musiqi təhsilinin olmamasına baxmayaraq, mahnılarını özü bəstələyirdi. Hüseynin bəstələdiyi repləri, özünəməxsus xırıltılı səsi qısa müddətdə onu populyarlığın zirvəsinə qaldırır. O zamanlar onun bəstələdiyi bütün replər insanlar tərəfindən sevilərək, dillər əzbərinə çevrilir. Muğamla repi sintez edən, repə ikinci nəfəs verən Hüseyn Dərya insanların qəlbini fəth etməyi bacarırdı.

Bir günün içində tanınan, söylədiyi hər bir sətri dillər əzbərinə çevrilən Hüseyn bir müddət keçdikdən sonra narkotik maddə aludəçisi olur. Bu isə onun qısa zamanda zirvədən enməsinə səbəb olur. Dərya səhnədən uzaqlaşır. Özünə qapanıq olan bu insan həyatının bu çətin günlərini çox ağır keçirir. Bir müddət məhbusluq həyatı yaşayan repçiyə bir zamanlar onu sevən pərəstişkarları, dostları biganə olurlar. Hər kəs ondan üz çevirir. 2008-ci ildə sonra narkotikdən istifadə etməyib.
Bütün bunlara baxmayaraq, özündə güc tapan Dərya həyatında yeni, təmiz bir səhifə açmaq istəyir. Özündə güc tapıb yenidən mahnılar bəstələməyə başlayır. Lakin bu dəfə də həyat ona qucaq açmaq istəmir. Son dəfə son "Can vətənim" mahnısına klip çəkdirib. İslam dinini yüksək qiymətləndirən mərhum sənətçi Kərbəla ziyarətində də olub. "Olum ya ölüm” adlı klipində də bu nüansların şahidi oluruq.
 

O, 15 mart 2014-cü ildə avtomobil qəzasına düşərək, bu dünyadan əbədi olaraq köç edir.
Hüseyn Dərya iki dəfə ailəli olub. Onun Aişə adlı qızı və Cahangir adlı oğlu var.

 Əntiqə Rəşid