EMİN ƏMRULLAYEVƏ MAFİYA HÜCUMU
Deməli, təhsil naziri ayın 7-də mətbuat konfransı keçirdi. Biz adətən yüksək vəzifəli məmurların Azərbaycan dili ilə bağlı problemlərini yazırıq. Biz deyəndə, söhbət təkcə «Ədalət» qəzetindən getmir və təbii ki, biz də yazırıq. Nazir sualları Azərbaycan dilində çox gözəl cavablandırdı. Və çox səmimi idi. Nazirdən daha çox mətbuat xidmətinin rəhbəri kimi özünü aparırdı, yəni eqo nümayiş etdirmirdi.
Bir jurnalist tapmaca kimi bir sual verdi, hərçənd ki, ondan əvvəl başqa jurnalistlərin bu mövzuyla bağlı verdiyi suallara cavab vermişdi.
İndi baxıram, saytlarda və sosial şəbəkələrdə Emin Əmrullayevi ağ yuyub quru sərirlər. Ona qarşı çox böyük bir hücum təşkil olunub. Və görürük ki, Əli Həsənovun trolları yeni məkanda yeni fəaliyyətdədirlər.
Ümumiyyətlə, Azərbaycan təhsil sistemini 30 ildə elə bir duruma salıblar ki, bu problemləri aradan qaldırmaq üçün gərək Allahın bacısı oğlu olasan.
Mən bir dəfə təhsildəki problemlərlə bağlı yazmışdım ki, Misir Mərdanov Allahın bacısı oğlu deyil ki, bu problemləri aradan qaldırsın.
Emin Əmrullayev də heç Allahın bacısı oğlu deyil. «Təhsil haqqında» Qanuna yenidən baxılmalıdır. Mən təhsil eksperti deyiləm, amma bir müddət müəllim işləmişəm. Əgər Azərbaycan boloniya sistemindən imtina edib yenidən köhnə sistemə keçsə müəyyən bir müddətdə Yusif Məmmədəliyev də, Həsən Abdullayev də, Cəlal Allahverdiyev də, Xudu Məmmədov da, Əhliman Əmiraslanov da, Arif Babayev də, Vaqif Abbasov da və sair və ilaxır yetişdirə bilər. 30 illik boloniya sistemində yuxarıda adları çəkilən belə bir şəxsiyyətləri yetişdirə bilmişikmi?