"Ədalət"in vaxtı: Mənsum İbrahimovla
Tarixin
bütün zamanlarında sərhədləri aşan, dünya xalqlarını birləşdirən bir həqiqət
olub – musiqi! Bəşəriyyətin qəlbini, ruhunu fəth
edən musiqilər arasında Azərbaycan muğamının da olması hər birimiz üçün böyük
qürurdur. Elə müsahibimin dediyi kimi, "Muğam bəşəri musiqidir, onu bütün dünya
anlayır”. Bu dəfə zamana muğamla körpü saldıq. Söhbətdən öncə
qonağımızı daha yaxından tanıyaq:
Xanəndə,
xalq artisti Mənsum İbrahimov – 1960-cı il oktyabrın 1-də Ağdam rayonunun
İmamqulubəyli kəndində anadan olub. 1982-1987-ci illərdə Asəf Zeynallı adına
Bakı Musiqi Texnikumunun muğam şöbəsində, 1988-1993-cü illərdə Azərbaycan Dövlət
Mədəniyyət və İncəsənət Universitetinin "Mədəni Maarif" fakültəsində
təhsil alıb. 1993-cü ildən "Leyli və Məcnun" operasında Məcnun rolunu
oynayır. Bundan başqa, "Aşıq Qərib"də Qərib, "Gəlin
qayası"nda Camal, "Sevil"də Azançı rollarını ifa edib. Opera səhnəsindəki
fəaliyyəti ilə bərabər həm də xalq və bəstəkar mahnıları, muğamların gözəl
ifaçısıdır. 1998-ci ildə Azərbaycanın Əməkdar artisti, 2005-ci ildə isə Xalq
Artisti fəxri adına layiq görülüb. 2010-cu ildə Azərbaycan prezidentinin sərəncamına
əsasən Şöhrət ordeni ilə təltif olunub. Azərbaycan Milli Konservatoriyasının
professorudur.
...Və Mənsum İbrahimovla zaman yolçuluğu:
– Zaman
nədir və sizin üçün nə əhəmiyyət kəsb edir?
– Zaman
geniş anlam daşıyır. Bizim həyatımız elə zamana bağlıdır. İnsan necə yaşayır, hansı işlər görür, özü, başqaları üçün nələr edir – bütün
bunlar həyat adlı zaman çərçivəsində baş verir. Biz bəzən hesab edirik ki, zamanı
idarə edirik, amma əslində o bizi idarə edir. Biz zamandan asılıyıq, o isə öz
işindədir.
– Siz zamandan nə dərəcədə faydalanmısınız, zaman sizdə nəyi dəyişə bilib?
– Mən deyə bilmərəm ki, zamandan maksimum yararlana bilmişəm. Amma bu yaşıma qədər düşünürəm ki, faydalanmışam, öz sənət yolumda müəyyən işlər görmüşəm. Amma insan həmişə zamanını düzgün bölə bilmir. Nə qədər hər işdə dəqiq olmağa çalışsaq da, yenə buraxdığımız dəqiqələr, əldən qaçırdığımız məqamlar olur. Çünki insan kompyüter deyil, canlı bir varlıqdır. Bəzən adam tənbəllik edir, özündən asılı olmadan onda ətalət yaranır. Mən şəxsən, həmişə zamanı düzgün dəyərləndirməyə çalışmışam və hesab edirəm ki, bu məndə alınıb.
– Bəzən
adamın könlündən bilərəkdən vaxt öldürmək keçir. Özü bunun yanlış olduğunu
bilsə də, yenə də vaxt itkisinə yol verir. Sizdə necə, belə hallar olurmu?
– Olur.
Məsələn, çox vacib bir işin reallaşmasını gözləyirəm. O iş alınana qədər əlim
başqa heç nəyə yatmır. Oturub həyəcanla həmin işin gerçəkləşməsini gözləyirəm,
aradakı, bilərəkdən itirdiyim vaxtı belə hallarda nəzərə almıram. Yaxud
harasa getmək istəyirəm, o səfərə qədər arada boşluq yaranır. Fikirləşirəm ki,
bu vaxt tez keçsəydi... Amma o boşluqdakı vaxt da ömürdən gedir axı! Tələsməyin
və ya vaxt itirməyin faydasız olduğunu bilirik, amma yenə də buna yol veririk.
Qəribədir, əlbəttə, amma insan həqiqətən də ziddiyətli məxluqdur.
– Hər
birimiz vaxtın surətindən gileylənirik, kimi dindirsən "vaxt uçur” deyəcək. Siz
necə vaxtın tempini tita bilirsinizmi?
–
Bacardığım qədər vaxtı düzgün bölməyə çalışsam da, yenə də zaman çatmır. Bəzən
bir dəqiqə belə vacib olur. Səhər 9-da dərsə gəlirəm, sonra operada məşqlərim
başlayır. Məşqdən sonra lent yazısına və ya çəkilişə, tədbirlərə gedirəm. Amma
bütün bu hərəkətliliyə baxmayaraq, səhər yenə də vaxtında dərsdə oluram. Mən
yalnız xanəndə deyiləm, pedaqoji, ictimai fəaliyyətim də var. Müəllimlik mənim
üçün çox şərəflidir. İfaçılıq bir başqa, müəllimlik isə daha artıq məsuliyyət tələb
edir.
– Yeri gəlmişkən,
bu zamanın müəllimliyi necədir? Məsələn, əvvəllər müəllim anlayışı tamam başqa
idi...
– Təbii
ki, əvvəlki zamanlarda müəllimlik insanlar üçün çox uca bir zirvə idi. Amma o
da var ki, müəllim öz peşəsini sevirsə, həmişə ucadır. İstənilən zamanlarda yaxşı müəllimlər də olub, pis müəllimlər
də... Ümumiyyətlə,
"Ən gözəl
meyar xalqın verdiyi dəyərdir”
– Bəs
bugünkü tələbələr necə?
– Tələbə
hər zaman tələbədir – müəlliminin güzgüsüdür. Tələbənin necə yetişəcəyi müəllimdən
asılıdır. Təbii ki, tələbənin özünün, çalışqanlığının da burda rolu var. Bəzən
görürük ki, istedad var, amma tələbənin tənbəlliyi bunun tamamilə üzə çıxmasına
imkan vermir. Amma bu məqamda da əgər müəllimi yaxşıdırsa, tədricən öz həllini
tapan məsələdir. Bizim sahəmizdə tələbənin ilk növbədə istedadı olmalıdır. Biz Allahın bəxş etdiyi istedad üzərində işləyirik, onu püxtələşdiririk. Yəni təkcə
bilik vermirik, həm də ifaçı yetişdiririk. Bizim əməyimizin nəticəsini sabah
xalq ekranda görəcək. Şəxsən mən, tələbəmin ifası ilə yanaşı onun nitqindən
tutmuş, özünü aparması, oturuş-duruş mədəniyyətinin də formalaşmasına
çalışmışam. Çünki ekranda xalq o tələbənin timsalında həm də onun ustadına qiymət
verir. Bizim sənətin məsuliyyəti ondadır ki, hər bir işimiz göz önündədir, hər
bir hərəkətimizə qiymət verilir. Ən gözəl meyar da elə xalqın verdiyi dəyərdir.
– Bu qədər
məsuliyyəti daşımağa hər insanın gücü çatmaz. Hərdən bezginlik, yorğunluq hiss
edirsinizmi?
–
Bezginlik yox, çünki mən öz işimi, sənətimi sevirəm. İnsan öz peşəsini sevirsə,
ondan heç vaxt bezmir. Amma yorğunluq əlbəttə ki, olur. Hətta bəzən o qədər
yoruluram ki, heç su içməyə belə halım olmur. Ancaq səhər yuxudan qalxıb, yenə
də həvəslə, yüksək əhval-ruhiyyəylə işə gedirəm. Hərdən bayram günlərində özümə
istirahət verib, evdə oluram. Amma istirahətdən çox özümü boşluğa düşmüş kimi
hiss edirəm. O iş qrafikinin gərginliyindən sonra durğunluğu sevmirəm. Məni
formada saxlayan elə işimin gərginliyidir. Mən artıq alışmışam və özüm
bunu sevə-sevə qəbul etmişəm. Bu, mənim həyat tərzimdir. Özümü bu cür cəmiyyətə
yararlı hesab edirəm.
– Biz
iki əsrin qovşağında yaşadıq, bir-birindən tamamilə fərqlənən dövranları
gördük. Müstəmləkədən, müstəqilliyə adladıq. Amma hər iki dövranın da özünəməxsus
cəhətləri, üstünlükləri olub. Sizcə, sənət adamına hansında daha çox diqqət
vardı, hansı dövranda daha rahat işləyə bilirdi?
– Əlbəttə indi daha rahatdır! Mənim
sənətə gəlişim 1985-ci ilə təsadüf edir. Dahi bəstəkar Üzeyir Hacıbəyovun
anadan olmasının 100 illiyi ilə əlaqədar müsabiqə keçirilirdi. Mən o müsabiqədə
laureat oldum. Şövkət Ələkbərova kimi böyük bir sənətkar münsiflər heyətində
idi. Məni operaya Şövkət xanım apardı. O zaman orda təcrübə qrupu vardı. Kiçik
rollarda oxuyub, ayda 80 manat maaş almağa başladım. Ümumiyyətlə, o dövr –
1985-1993-cü illər arası çox gərgin oldu, böyük xaos yaşandı, torpaqlarımız
işğal olundu. Sənət adamları üçün də çox çətin idi. Üstəlik, həmin dövrdə Azərbaycanın
cəmi bir telekanalı vardı, gərgin vəziyyətlə əlaqədar incəsənət tədbirləri də az təşkil
olunurdu. Mən 80 manat maaşla dolanır, heç toylara da getmirdim, dözürdüm. Amma
niyə dözdüyümü də bilirdim, mənim ümidlərim, məqsədim vardı. İnanırdım ki, Azərbaycan
səhnəsinin ən yaxşı Məcnunlarından biri olacam. O zaman bunu kimə desəydim
inanmazdı. Çünki çox gənc idim, məndən daha təcrübəli ifaçılar vardı. Açığı, həm
də gəncliyə qarşı çox böyük qısqanclıq olurdu...
"Öz üzərində
işləyən insan hansı yaşda olursa-olsun mütləq hədəfinə çatacaq”
– Əslində,
bütün dövrlərdə belə nəsillərarası "savaş” olur. Daha yaşlı olanlar gəncləri tənqid
edir, gənclər özlərindən əvvəlkiləri bəyənmir...
– Bəli,
bu həmişə olur. Amma özünü təsdiq edən, öz üzərində işləyən insan hansı yaşda
olursa-olsun mütləq amalına, hədəfinə çatacaq. Məsələn, oturub məni nə vaxt
Məcnun qoyacaqlarını gözləmədim. Çətinliklərə dözdüm, çalışdım, təcrübə
topladım və 1993-cü ildə Məcnun oldum. İndi mən 130-cu dəfə səhnədə Məcnunu
oynamışam. Məni qəbul etməyən, bacarığıma inanmayanlar, sonralar dedilər
ki, ən yaxşı Məcnunlardan birisən. Deməyim odur ki, kənardan tənqidlərə
baxmadan, yüksək iradə, əzmkarlıq, dözümlülük sayəsində məqsədə çatmaq olar.
– Yeni
muğam ifaçıları yarana bilər, Azərbaycanda istedadlı gənclər çoxdur. Yəqin ki, hər
muğam ifaçısı da Leyli və Məcnunu oynaya bilməz...
–
Tamamilə doğrudur. Xanəndəlik başqadır, Leyli və Məcnunu oynamaq tamam başqa.
Burda kompleks ifa özünü göstərir. Həm oxumalısan, həm tamaşaçıya o rolu
çatdırmalısan. Konkret olaraq, Leyli və Məcnunu ifa etmək üçün yetişməlisən.
Onların paltarını geyinib, ifalarını əzbərləməklə olmur. Hər şey tamaşaçının
gözü ilə ölçülür, tamaşaçı bu rolda ifaçını qəbul edəcəksə, o bir nov, təsdiqlənir.
Bu yeganə sənətdir ki, hətta bəyənməsə, övladın belə səni dinləməz. Qulaq kimi
dinləmək istədiyini özü seçir. Mən hər dəfə Məcnun kimi səhnəyə çıxanda elə
bilirəm ki, Füzulinin, Üzeyir Hacıbəylinin ruhu qarşısında imtahan verirəm.
Obrazın içindən çıxış etmək böyük məsuliyyətdir. Tələbələrə də bunu aşılamağa
çalışıram, bacardıqca onları səhnədə irəli verirəm. Təbii ki, biz səhnədə əbədi
deyilik. Bizi gənclər əvəz edəcək, onların da püxtələşməsinə çalışmalıyıq.
– Muğam
yarandığı vaxtdan Azərbaycan xalqının qəlbindədir, həmişə sevilib. Ancaq
muğamın da eniş-yoxuş dönəmi oldu. Məhz bu gün muğam öz zirvə nöqtəsindədir.
Amma necə oldu zirvəyə gəldi? Başqa musiqi janrlarını dinləyib muğamın qədrini
bildik, yoxsa özümüzə xas olduğunu bir daha anladıq?
– Düz buyurdunuz, muğam bizim qəlbimizdədir. Muğamı xalqımız ona görə sevir ki, bu bizim həyat tərzimizdir. Muğam təkcə ifa deyil, o həm də obrazdır: burda anamızın laylası, xalqın keçdiyi keşməkeşli həyat yolu, kədərimiz, itkilərimiz, sevincimiz, qürurumuz əks olunur. Həqiqətən də muğam zaman-zaman enişlərdən, yoxuşlardan keçdi, amma heç vaxt ölmədi. Sadəcə, ona qarşı diqqət, maraq zəiflədi. 1993-cü ildən bəri muğama yaxşı mənada münasibət dəyişdi. Bu, əlbəttə, dövlətimizin qayğısından irəli gəldi. Hər şey ulu öndərimiz Heydər Əliyevin muğama göstərdiyi diqqətlə başladı. Sənətkarlara dəyər verdi, konsertlərimizə gəldi. Konsertlərdən, tamaşalardan sonra şəxsən hər birimizlə maraqlandı. Bu da, əlbəttə, xanəndəyə stimul verdi, tamaşaçıda isə maraq artırdı. Daha sonra əməli işlər başlandı. Muğam təbliğ olundu. Heydər Əliyev Fondunun, Mehriban xanım Əliyevanın muğama göstərdiyi xidmətlər misilsizdir. Mən bu prosesin içindəyəm, həm münsif, həm də bir ifaçı kimi. 2005-ci ildən etibarən muğam müsabiqələrinə başlandı. Qarabağ xanəndələrinin diskləri ərsəyə gəldi, Beynəlxalq Muğam Mərkəzi yaradıldı, xanəndələr təltif olundu, onlara ev verildi... Muğama və onun ifaçılarına olan bu qayğı xalqın diqqətini, marağını çəkdi. Artıq 10-cu dəfə muğam müsabiqəsi keçirdik, hər müsabiqədən xalqımıza 20 yeni ifaçı təqdim edirik. Heç bir dövrdə muğama bu qədər axın olmamışdı, bu qədər istedadlı gənclər hazırlanmamışdı.
"Muğamımız
bu gün intibah dövrünü yaşayır”
– Mən
bir tamaşaçı kimi hər dəfə muğam müsabiqələrini izləyəndə həm təəccüblənir, həm
də qürurlanıram ki, bizim nə qədər istedadlı gənclərimiz varmış...
– İnandırım sizi ki, bu müsabiqə olmasaydı, o gənclərin çoxunun istedadı batacaqdı. Çünki onların çoxu ucqar rayonlardadır, gündəlik məişət qayğılarına başları qarışıb, çoxunun şəhərə gəlməyə imkanı olmurdu . Biz belə gəncləri əvvəllər rayon-rayon, kəndbəkənd gəzib tapırdıq. Amma bu gün yeni nəsil muğam ifaçılarını müsabiqəyə cəlb edəndə, onları yetişdirəndə, milli mədəniyyətimizə nə qədər töhfə vermiş oluruq! Və bu işdə Mehriban xanım Əliyevanın müstəsna rolu var. O bunu sadəcə, iş xatirinə eləmir. O, Azərbaycanın milli mədəniyyətini qəlbən sevir. Bir görsəydiniz, xarici ölkələrdə bizim azyaşlı ifaçılarımız Qarabağ şikəstəsini oxuyanda o, necə qürur hissi keçirir!.. Biz həqiqətən də şanslıyıq ki, müstəqil dövlətimiz mədəniyyətimizə, muğamımıza belə qayğı göstərir, dünyada təbliğ olunuruq. Şanslıyıq ki, möhtəşəm tədbirlər ölkəmizdə keçirilir: Eurovizion mahnı müsabiqəsi, Beynəlxalq Muğam Müsabiqələri və nəhayət, Avropa İdman Oyunları – bu qlobal layihələrlə Azərbaycan dünyada yeni bir tarix yazır. Və bu cür möhtəşəm tədbirləri də muğamla başlayırıq, fəxr edirəm ki, milli komandamız mənim ifamda səslənmiş "Qarabağ şikəstəsi”nin sədası altında irəlilədi. Milli ədəbiyyatımızı, musiqilərimizi dünyaya göstərdik, balabanın, "Sarı gəlin”in, Nizami Gəncəvinin məhz bu xalqdan olduğunu sübut elədik. Bura gələn turistlər təkcə idmanımızı görmür ki, mətbəximizdən, musiqimizdən, mədəniyyatimizdən, insanlığımızdan xəbərdar olur. Bütün bunlar Azərbaycan rəhbərliyinin 24 il ərzində qurduğu düzgün siyasətin nəticəsində baş verdi. Konkret olaraq, muğamımız bu gün intibah dövrünü yaşayır. O qədər xalqın qanına hopub ki, hətta toy şənliklərində belə hər bir müğənni muğam oxumağı özünə borc bilir.
– Toy
demişkən, belə bir fikir səsləndirilir ki, muğam kimi müqəddəs bir ifa toyda –
içki məclisində oxunmaz...
– Bilmirəm
bu fikirləri kimlər səsləndirir, amma mən bu düşüncəni qəbul etmirəm. Tarixən
bizim muğam üçlüyümüz toy şənliklərinin bəzəyi olub. Ən tanınmış sənətkarlarımız
el şənliklərində muğam ifa ediblər. Muğam xalq sənətidir. Bəs elə isə niyə
xalqın xoş günündə səslənməsin?! Bu da bir rəngarənglikdir ki, muğam özündə həm
kədəri, həm şadyanalığı birləşdirir. Muğam sevgi aşılayan, şux xalq mahnıları
ilə birgə oxunur.
–
Zamanla hər bir sənət, eləcə də ədəbiyyat, incəsənət modernləşir. Bəs muğamda necə, yeniliklər, sintezlər olmalıdır, yoxsa onun klassikliyi qorunmalıdır?
– Elə sənət
növləri və ya dahilər var ki, onları müasirləşdirmək olmaz. Çünki onların
klassikliyi istənilən zamanda aktualdır, keçərlidir, başqa sözlə, öz klassikliyi
ilə bütün zamanlarda müasirdir. Amma muğama gəlincə, peşəkar səviyyədə sintezlər
olarsa, bu muğama rəngarənklik qatar. Elə ilk dəfə muğama sintezi Üzeyir Hacıbəyov "Leyli və Məcnun”da edib – muğamı opera ilə birləşdirib. Daha sonra Fikrət
Əmirov, Niyazi, Vasif Adıgözəlov və bir çox böyük bəstəkarlarımız muğamı sintez
edib. Götürək Vaqif Mustafazadəni: muğamla cazı necə birləşdirdi! Bu gün bütün
dünyada caz-muğam məşhurdur. Hazırda muğamı bəstəkar Siyavuş Kərimi peşəkar şəkildə
sintez edir. Latın Amerika musiqisi ilə birləşdirdi. Muğam elə hər bir xanəndənin
ifasında yeniləşir. Hər ifaçı muğama bir nəfəs gətirir. Yüz il bundan öncəki
muğamla, bugünkü arasında böyük fərq var. Yüz il sonra da indiki muğamdan fərqlənəcək.
Sxem dəyişmir, amma onun içərisində hər kəs öz ifasını, improvizəsini gətirir.
Biz 2007-ci ildən bəri dünya orkestrləri ilə muğam ifa etməyə başlamışıq.
Artıq 15 ölkədə belə konsertlər vermişik və hər millətin tamaşaçısı da ifamızı yüksək coşquyla qarşılayıb. Braziliyada tələbəm
Arzu Əliyeva ilə o ölkənin simfonik orkestrinin müşayiəti ilə konsert verdik.
2500 nəfərlik zalda konsertimiz anşlaq olmuşdu. İfadan sonra tamaşaçılar yenidən
bizi səhnəyə dəvət etdilər. Həmin səhnədə isə yalnız barmaqla sayılacaq qədər
azərbaycanlı vardı. Bu onu göstərir ki, Azərbaycan muğamı həqiqətən də, bəşəri
musiqidir.
–
Zamanla bağlı insanlara nə tövsiyə edərdiniz?
– Ən əsası
zamanı düzgün dəyərləndirsinlər. Adam gənc olanda vaxtın qədrini bilmir.
Düşünür ki, həmişə belə qalacaq, istədiyi vaxt müəyyən bir işi görə bilər. Anlamır
ki, zaman bizi gözləmir. Amma yaşa dolduqca yanıldığını dərk
edir. Ona görə də zamanı boşa vermək olmaz. Tələbələrimə də deyirəm, sizi tənqid
edən, haqqınızda danışan insanlara gülüb keçin. Bu cür adamların işi elə nöqsan
tutmaqdır. Sizin onlara cavabınız işiniz, uğurlarınızdır. Zaman keçəcək,
onların boş danışığı, sizin isə gözəl ifalarınız qalacaq. Həyat o qədər qısadır
ki, su kimi axıb gedir. Nə vaxt ömrün keçdiyini heç hiss etmirsən. Hər
birimiz bu dünyada qonağıq, ona görə də bizə ayrılan zamanı düzgün dəyərləndirməliyik.
Zamanda bir iz qoymalıyıq.
Biz də "Ədalətin” vaxtı”nın
qonağına Vaxtın onunla həmişə ədalətli davranmasını arzu edirik.
Şəfiqə Şəfa