Dünyanın qara üzü: "Yeraltı sivilizasiya”
"Örtsə də
Günəşi qara buludlar, yenə günəş adlı bir şöhrəti var” deyən şair bununla çox mətləblərə
işarə etsə də, biz özümüzə, daha doğrusu mövzumuza uyğun olan tərəfinə baxaq: yaşadığımız
dünyanın ən əsas üstünlüyü, bizə nəsib olan Ali İşıqdır. Qara buludlara, zülmət
gecələrə, bir sözlə dünyanın qara üzünə baxmadan Günəşin şəfəqlərində xumarlana
bilirik. Çünki bu işıqdan əbədi məhrum olan dünya da varmış...
Bu dəfə "Dünyanın
qara üzü” rubrikasında yeraltı dünyadan – ayağımızın altındakı sivilizasiyadan
bəhs edəcəyik. Bu günə qədər alimləri çaşdıran, fikirlərini ikiyə bölən yerdənaşağı
həyat anlayışı dəfələrlə gündəmə gətirilib, ən azından açıq-gizli qeydlərdə,
kitabxanalarda özünə yer edib – yəni mövcudluğu danılmayıb. Üstəlik, bu müəmma
paranormala meyilli ekstrasenslər tərəfindən deyil, alimlər: antropoloqlar,
geoloqlar tərəfindən dəfələrlə təsdiqlənib. Bir az da fantast yazarların ocağa
yağ tökməsini nəzərə alsaq, ortaya qandonduran, müəmmalı təsvirlər çıxacaq.
Zaman-zaman
geoloqlar, hətta şaxtalarda işləyən sıravi mədənçilər yerın altından qəribə səslər,
işıqlar gəldiyini duyub, görüblər. Müxtəlif dövrlərdə rastlanılan bu müəmmalı
görüntülər alimlərin və fantast yazarların da diqqətini çəkib: birgə və ya
ayrı-ayrılıqda araşdırılma aparılsa da konkret nəticələr əldə olunmayıb. "Bətn”indəki
aləmini kənar gözlərdən qoruyan Yer ana da əslində buna tamamən müvəffəq
olmayıb, ya dəcəl övladları dinc durmayıb işıqlı dünyaya can atıblar, ya da
işıqdan zülmətə qaçan macəraçılar həmin aləmdən nələrisə üzə çıxara biliblər.
Dünyada rəsmi
olaraq yeraltı varlıqlar haqqında məlumatı yazıçı, araşdırmaçı, jurnalist
Riçard Şeyver ötən əsrin 40-cı illərində bəşəriyyətə ötürüb. Yerdənkənar
sivilizasiyaları araşdıran jurnalist bir neçə həftə yerin altında yaşayıb. "Şeyverin
hekayəti” yarıtəxəyyül, yarıgerçək hesab olunsa da 1946-cı ildə ABŞ-ın "Qəribə əhvalatlar”
jurnalında çap olunduqdan sonra redaksiyaya 50 min məktub gəlib. Bu məktublarda
minlərlə oxucu yeraltı səyahətlər zamanı rastlaşdığı qorxunc macəralardan
yazırdı. Çoxu şaxtaçı olan bu oxucular iddia edirdilər ki, Şeyver haqlıdır,
yerin altında bizdən də yüksək inkişaf etmiş sivilizasiya mövcuddur, onlar
yarıheyvan-yarıinsan formasında, şüurlu, bacarıqlı məxluqlardır və günün birində
yerin üstünü də zəbt etməyi planlaşdırırlar.
Eynilə
buna bənzər fikirləri tanınmış amerikalı fantast yazıçı Edvard Bulver Litton da
irəli sürüb, həm də 1871-ci ildə. O da məhz şaxta vasitəsilə yerin altına enmiş
macəraçının başına gələnlərdən, aralarında bir müddət yaşadığı başqa növ irqin xüsusiyyətlərindən
yazır. Bizdən qat-qat inkişaf etmiş olan bu sivilizasiya öz utopik idarəçiliyində
firavan həyat sürsə də, başqa dünyanı özlərinə məxsus odlu silahla təhlükə
qarşısında qoya bilərlər. Elə əsərin qəhrəmanını da sonda bu silahla öldürmək istəyirlər,
amma ona aşiq olan həmin irqən bir qızın sayəsində yenidən şaxtaya, ordan isə mənsub
olduğu dünyaya qayıdır.
Bənzər əsərlər
hələ XVI əsrdən etibarən qələmə alınıb. Həmin dövrdə Uilyam Ridin yazdığı "Qütb
xəyalətləri”, sonrakı dövrlərdə fantastikanın atası Jül Vernin "Yerin mərkəzinə
səyahət”i, Edqar Allan Ponun "Artur Qordon Pimin rəvayəti” və başqaları yeraltı
dünya macəralarından bəhs etsə də, həqiqətə bənzər, çox vaxt faktiki olaraq
uyğunluqlar mümkün olur. Ümumiyyətlə, fantast yazarları boşuna "zaman yolçuları”
adlandırmırlar. Bu istedadlı insanların əksəriyyətinin yazdıqları əsərlərin
süjetini yuxuda görmələrini deməsi də ayrı bir qəribəlikdir. Burdan belə qənaətə
gəlmək olar ki, hər halda ağılları başlarında olan bu insanlar ya həqiqətən də
gələcəyi görmə qabiliyyətlərinə malikdirlər, bu dünyaya xəbərçi olaraq göndəriliblər,
ya da yuxuda gələcəkdən, kənar varlıqlardan agah olaraq və təbii ki bir az da təxəyyüllərini
işə salaraq bütöv bir diqqətçəkici ədəbiyyat yarada biliblər. Bir neçə misal çəkim:
Jül Vern "Yerdən Aya” əsərində (1865-ci ildə yazılıb) təxminən 100 il sonra
baş verəcək kosmosa uçuşu təsvir edir, maraqlıdır ki, fəzaya ilk uçuşun haradan
həyata keçiriləcəyini də təxmin edir – həmin yer məhz Baykanur kosmodromundan
bir neçə km aralı idi. Kosmodrom Jül Vernin əsərindən 90 il sonra tikilib. Edvard
Bulver Litton 1871-ci ildə yazdığı "Gələcək irq” əsərində (yeri gəlmişkən, əsərin
ingiliscədən tərcüməsi bəndeyi-həqirinizə aiddir) bu gün məişətdə aktiv istifadə
olunan "cam pəncərə” adlandırdığımız pəncərə sistemlərindən, yeni kəşf olunmuş
qanadlı paraşütlərdən, ən maraqlısı isə elektrik təzə-təzə kəşf olunduğu dönəmlərdə
bu günün sensor işıqlarından bəhs edir. Rey Bredberi ötən əsrin 40-cı illərində
pult barədə öncədən məlumat vermişdi. Maraqlıdır ki, Bredberi özü 2012-ci ildə
dünyasını dəyişib və öz öncəgörücülüyünün şahidi olub.
Qeyd
etdiyimiz kimi, alimlər də yeraltı dünyanın öyrənilməsində maraqlıdırlar. XIX əsrdə
amerikalı alim Con Simms Yer Kürəsinin yatmış vulkan kraterlərindən girməklə
yeraltı dünyaya elmi-tədqiqat qruplarının göndərilməsi təklifini irəli
sürmüşdü. Yerin altındakı sivilizasiyalar III Reyxin də diqqətini çəkib.
1942-ci ilin aprelində Adolf Hitlerin silahdaşı Gimlerin göstərişi ilə
yaradılmış ekspedisiya yerin alt dünyasına girişi axtarmağa yollanır, amma
axtarışlar rəsmi məlumatlara görə nəticəsiz qalıb.
Yeraltı
sivilizasiya haqqında əsatirlər demək olar ki, bütün xalqların ədəbiyyatında
var. Bu da bir həqiqətdir ki, bir mövzunun yayğın olması onun gerçəkliyinə, nə
zamansa mövcudluğuna dəlalət edir. Alt irqin ora necə keçməsi ilə bağlı mülahizələr
müxtəlifdir. Əsas versiya Nuh peyğəmbərin dövründəki Böyük Daşqınlar zamanı
suyun altında qaldığı zənn edilən insanların əslində sualtı mağaralar vasitəsilə
okeandan aşağı – quru hissəyə keçməsi üzərində dayanır. Yerin altındakı bu
boşluqlarda məskunlaşan əhali burda da törəyərək, sivil mövcudluqlarını davam
etdiriblər. Amma bizdən xeyli irəli getdikləri üçün (məhdud şərait insanları daha
çox kəşflərə vadar edir) yuxarı dünyanın insanlarını, başqa sözlə, əcdadlarının
həmdünyalılarını bəyənməməyə başlayıblar. Deyilənə görə bizdən çox yaşayırlar,
daha yaraşıqlı, sağlam və dərrakəli olurlar. Yüksək texnoloji nailiyyətləri
var, bütün xəstəlikləri sağalda bilirlər. Sosial-siyasi idarəçiliyi utopiyaya
yaxın monarxiyadır. Görünür, başıpozuq demokratiya ancaq yerüstü insanları cəlb
edir. E.B.Littonun əsərindəki yeraltı alimin dili ilə desək: "Yenilik cahil və
uğursuz insanların axtarışıdır. Çünki onlar köhnəlikdə tapa bilmədiklərini, müvəffəq
olmadıqlarını yenilikdə axtarırlar”.
Yerin
altına keçid qapısını ilk dəfə 1977-ci ildə aşkar ediblər. 1981-ci ildə isə
yazıçı, antropoloq Ceyms Makken Aydaho ştatında hinduların çox qorxduğu bir
mağarada belə bir dəliyin olduğunu bildirmişdi. Sonra isə ekspedisiya qrupu
yaradaraq mağaraya girmiş dözülməz qaz sızması səbəbindən uzağa gedə bilməmişdilər.
Ancaq qulaqlarına qəribə səslərin gəldiklərini bütün heyət etiraf etmişdi.
İngilis
geoloqu Ronald Kalasın mədənlərdən birində rastlaşdığı hadisə də çox
maraqlıdır: qazmaçılar mədəndə işləyən maşın gurultusunu eşidirlər, həmin yeri
qazdıqda isə aşağıya doğru pilləkən görürlər. Əvvəlcə düşünürlər ki, qədim türbə
tapıblar. Oradan aşağı düşdükdə isə qəribə səslər və həmin maşının daha aydın
eşidilən gurultusundan qorxub qaçıblar. Bənzər hadisə 1963-cü ildə Pensilvaniya
ştatında da yaşanıb. İki qazmaçı divarda qapıya bənzər qaya parçası görüb. Onu
açanda isə mərmərdən salınmış yollar qazmaçıları şoka salıb.
Rusiyanın Xakasiya respublikasında yerləşən Alatau dağında Kaşkulak mağarası var – "Qara iblisin yuvası” kimi tərcümə edilir. SSRİ-nin müxtəlif dönəmlərində bura tədqiqatçılar göndərilib, amma hamısı da başını götürüb qaçıb. Orada işləyən bütün tədqiqatçılar eyni mənzərəni gördüklərini təsvir edirlər. İçəridə köhnə papağının altından buynuzu çıxan, saqqallı, gözlərindən alov yağan bir qoca görüblər!
Xarner
soyadlı tədqiqatçı isə cənubi Amerikada gördüklərinin dəhşətindən uzun müddət
ayıla bilməyib. Hindu qəbilələrində təxminən bir il yaşasa da onların inancları
haqqında bir şey öyrənə bilməyib. Hindular bilərəkdən bu məlumatları gizli saxlayırmışlar. Ta
ki qəribə bir içkini içənə qədər. Hinduların "Müqəddəs içki” adlandırdığı bu
mayeni içdikdən sonra gördüyü səhnə barədə alim sonralar belə yazır: "Gözümün
önündə Yer kürəsi milyard il qabaqkı formada göründü. Sonra göydən qara rəngli
cisimlər yağmağa başladı. Onlar düz mənim qarşıma düşürdülər. Yaxına gəldikcə
bu cisimlərin qəribə varlıq olduğunu gördüm: qara, parlaq dəriləri, qanadları
vardı, bədənləri isə kit (su heyvanı) formasında idi. Çox yorğun görünürdülər,
elə bil uzaq səfərdən qayıtmışdılar. Nəsə deməyə başladılar, qəribədir ki,
onları anlayırdım. Deyirdilər ki, bu dünyanın ağası onlardır, biz isə onların
nökərləriyik. Gün gələcək, hamının gözünə görünəcəklər...”
Bir sözlə, yeraltı dünyanın mövcudluğu danılmır. Düzdür, belə deyilir ki, orada yaşamaq mümkün deyil, çünki qaz sızıntısı, rütubət, yüksək temperatur orqanizmi məhv edər. Bəli, bizim orqanizmimizi məhv edər, bəs onlarınkını?! Niyə onların da bizim kimi varlıq oluduğunu düşünürük? Güman ki, illər və əsrlər keçdikcə yeraltı irqlərin də orqanizmi şəraitə uyğunlaşıb. Amma bu gümanlar nə qədər dəqiqləşdirilməyə çalışılsa da, Yerin altı haqqında dəqiq məlumatlar hələ də "alt” olaraq qalır, yəni sözün hər iki mənasında işıq üzü görməyib.
Ardı var...
Şəfiqə ŞƏFA