Yayın bitməsinə az qalmasına baxmayaraq, paytaxtın bəzi ərazilərində, eləcə də Günəşli qəsəbəsində neçə vaxtdır ki, hökm sürən su problemi hələ də davam edir.

Adalet.az xəbər verir ki, AzTV-yə danışan sakinlər həm Köhnə, həm də Yeni Günəşlidə susuzluq probleminin olduğunu bildiriblər.

“Paltarlarımızı, qab-qaşığımızı yuya bilmirik. Ancaq imkan edib çay üçün su götürə bilirik”, - vətəndaşlar söyləyiblər.

Qeyd edilib ki, çoxmərtəbəli binaların yuxarı mərtəbələrində yaşayanlar içmək üçün suyu satın alır. Aşağı mərtəbələrdə yaşayanlar isə zirzəmilərə su çənləri yerləşdiriblər. Lakin suyun verilmə müddəti o qədər qısa, təzyiqi isə aşağıdır ki, bu çənləri belə doldura bilmirlər.

“Demək olar ki, su verilmir. Yaşlı adamlarıq, suyu haradan daşıyaq? Axşamlar ümumiyyətlə gəlmir”,- deyə sakinlər bildiriblər.

Süjetdə o da qeyd olunub ki, paytaxtı, ətraf kənd və qəsəbələri əsas su ilə təmin edən Ceyranbatan su anbarında kifayət qədər su var. Belə ki, bir saniyədə Bakı şəhərinə 14 ton su ötürülür. Su anbardan 7 magistral kəmər vasitəsilə paylanılır.

ADSEA-nın rəis müavini Oruc Bayramov isə məsələyə belə münasibət bildirib: “Şəbəkə tam dolmalıdır ki, su qıtlığı aradan qaldırılsın. Dolması üçün də kütləvi şəkildə su verilməlidir. Bunun üçün də kəmərlər yenidən işlənməlidir”.

Onun sözlərinə görə, içməli suyun verilməsində yaranan problemin digər bir səbəbi isə əhali sayının artmasıdır: “Məsələn, əvvəllər 3 bina var idi və onlara 100 mm-lik boru ilə su gedirdi. İndi ətrafında da bina sayı çoxalıb. Həmin boru ilə artıq 3 yox, 10 binaya su gedir. Bu çatmayacaq axı…”

Daha ətraflı videomaterialda: