adalet.az header logo
  • Bakı 12°C
23 Yanvar 2023 14:40
1044
MARAQLI

Anna ermənicə mərsiyə oxuyub

Paşinyanın övrəti Anna başına şal bağlayıb üz qoyub İrana. Tehrana düşər-düşməz Annanı xurmayla çaya müsafir eləyiblər. Az keçmiş, İranın xanımağası Cəmilə Sədat Ələmolhoda qızı Reyhanə Rəisiylə müştərək Annayla dodaq dərbəşdiriblər.

Xoş-beş, on-onbeş, ələşəni küləşənə, İranı Turana qatandan sonra Anna qayıdıb ki, bu türklərlə bizim qan-qadamızdan xəbərdarsınız. Xocalıda başlarına oyun açdıq, Ağdamda məscidlərini tövlə elədik. Hələ insaf eləyib yerli-dibli uçurmadıq, arada minarəsinə çıxıb ətrafa göz gəzdirirdik. İllərdir məscid söhbətindən yaxamız qurtarmır. İndi baxıram, bizə dəstəyinizdən pəjmürdəhal oluban bu məscid söhbətini başınıza qaxınc eləyirlər. Ki, nətəhər olur, İran kimi İslam bayraqdarı Ağdam məscidini tövləyə çevirən bizə qucaq açır?! Xahişe-mikonəm, məni aparın ən müqəddəs şəhərinizə, ziyarətgahınıza. Günahlarımı yuyum, paklanım. Özü də, bundan ən qazanclı siz çıxarsınız ha. Dəxi kimsə bizim dostluğumuza kəm baxmaz.

Annanın bu sözü Cəmilə Sədatın xoşuna gəlib, Annanı aparıblar Qum şəhərinə. Əvvəlcə məsciddə müsafir eləyiblər, Anna Akopyan moizəyə qulaq asıb, sonra isə aparıblar Həzrəti Fatimənin məqbərəsinə. Məclis qurulub, mərsiyəxanlar, əlləri saç yolmağa, sinə vurmağa amadə arvadlar. Mərsiyəxan “Ya Fatimə” deyəndə arvadlar nətəhər qışqırıblar, nətövr ağlayıblarsa Anna özünü saxlaya bilməyib, başlayıb hönkürməyə. Hönkürə-hönkürə “axbercan” deyib sinəsinə vurub, “axbercan” deyib dizinə çırpıb. Sonra Annaya müqəddəs torpaqlardan düzəldilmiş möhür və təsbeh də hədiyyə ediblər.

İndi ola bilsin, Annanın bu ziyarəti farsların ürəyincə oldu, günahlarını bağışladılar, amma inanmıram ki, nə Həzrəti Fatimə, nə o müqəddəslər, nə də Allah bu ziyarəti qəbul eləyə...

 

Eminquey