Müstəqil Jurnalistlərə Texniki və Hüquqi Yardım İctimai Birliyi Qeyri-Hökumət Təşkilatlarına Dövlət Dəstəyi Agentliyi tərəfindən maliyələşdirilən layihə çərçivəsində yeni filmin çəkilişlərinə hazırlaşır. 

Bu barədə “Ədalət” qəzetinə layihənin rəhbəri Asəf Quliyev məlumat verib. O filmin "Konstitusiya və Suverenlik İli"nə həsr olunan “Zəfər çağırışına hay verənlər” layihəsi çərçivəsində hazırlanacağını bildirib.

- Bu ideya hardan yarandı?

- Əslində bu filmin çəkilməsi ilə bağlı ideya yeni deyil. Bir neçə ildir ki, bu bardə düşünürdüm. Qismət belə oldu ki, bu il Qeyri-Hökumət Təşkilatlarına Dövlət Dəstəyi Agentliyinə bu ideya ilə müraciət elədim və layihə bəyənildi. Layihəyə qiymət verənlərə öz təşəkkürümü bildirirəm. Məqsəd Ermənistanın Azərbaycana təcavüzünün müxtəlif mərhələlərini bir layihədə birləşdirmək idi. 

- Bu hansı mərhələlərdir?

- Birinci mərhələ Ermənistanın təcavüzü və ərazilərimizin itirilməsi, İkinci mərhələ 30 ilə yaxın bir zaman insanların yaşadıqları. Və üçüncü mərhələ Azərbaycanın ərazi bütövlüyünü təmin etmiş, zəfərlə sonlanan Vətən müharibəsi. 

-Filmin qəhrəmanı varmı, varsa kimdir?

-Filmin qəhrəmanı “Qarabağ” futbol klubunun Azad Azarkeş Qrupu olan “İmarət”dir. Və film də Vətən müharibəsi şəhidi “İmarət”çi qardaşımız Məhəmmədəli İbrahimlinin şərəfinə “Məhəmmədəli” adalndılrılacaq. 

-Yəqin ki, filmin təqdimatı da nəzərdə tutulub?

- Sözsüz ki, layihə çərçivəsində filmin Ağdamda və Bakıda təqdimatları keçiriləcək. Təqdimat vasitəsi ilə bir cəmiyyətə, xüsusən də gənclərə filmin əsas mesajını çatdırmaq istəyirik.