Bilirsiniz ki, Ermənistanın baş naziri Nikol Paşinyan  8 avqust tarixli  Vaşinqton görüşündən sonra - 11 avqustda Rusiya prezidenti Vladimir Putinə zəng etdi.

 Media yazır ki, Baş nazir Rusiya prezidentinə bu il avqustun 8-də ABŞ-ın paytaxtı Vaşinqtonda aparılmış danışıqların nəticələri, o cümlədən “Ermənistan və Azərbaycan arasında sülh və dövlətlərarası münasibətlər haqqında Sazişin” paraflanması, ATƏT-in Minsk Qrupu mexanizmlərinin ləğvi, regional kommunikasiyaların blokadadan çıxarılması, ərazi və hüquq-mühafizə prinsipləri çərçivəsində ATƏT-ə birgə müraciət, eləcə də “Trampın beynəlxalq sülhə və rifaha aparan yolu” layihəsinə dair məlumat verib.

 Elə həmin gün İran Prezidenti Məsud Pezeşkian Ermənistanın baş naziri Nikol Paşinyanla telefon danışığı apardı. Yenə də hesabat!

 Qarşı tərəflərin susqunluğunu görən çarəsiz Paşinyan  görüşlə başğlı  “Fox Nyus” telekanalına geniş açıqlama vermək məcburiyyətində qaldı:"Məncə, saziş və bəyannamənin İran və Rusiya üçün çox ciddi faydaları var. Bu saziş həyata keçirildikdə İran dəmir yolu ilə Fars körfəzindən Qara dənizə çıxış əldə edəcək. Rusiya və İran iki ölkə arasında dəmir yolu əlaqəsi yarada biləcək".

Paşinyan faydalardan  danışaraq  regionda kommunikasiyaların və ya nəqliyyat dəhlizlərinin açılmasının hər kəs üçün faydalı olacağını bildirib:

“Demək istədiyim odur ki, əgər biz bu sazişin iqtisadi tərəfinə diqqət yetirsək, o zaman təkcə Ermənistan, Azərbaycan, ABŞ və Türkiyə deyil, həm də Rusiya və İran çox mühüm və hiss olunan, görünməmiş faydalar əldə edəcək. Hazırda Cənubi Qafqazdan İranı Rusiya ilə birləşdirən dəmir yolu yoxdur. Ona görə də mən bunu beynəlxalq sabitlik və təhlükəsizlik çərçivəsində bütün ölkələrə, o cümlədən bütün beynəlxalq ictimaiyyətə əhəmiyyətli faydalar gətirə biləcək çox mühüm saziş hesab edirəm”.

 Xatırladaq ki, avqustun 18-də İran Prezidenti Məsud Pezeşkian Ermənistana səfər edəcək. Məlumata görə, Pezeşkian Ermənistanda avqustun 21-nə kimi qalacaq. Onun İrəvan biznes forumunda iştirakı planlaşdırılır. Amma  hər kəsə məlumdur ki, səfərin məqsədi  ABŞ-ın Qafqaza yerləşməsini əngəlləmək yollarını tapmaqdır.

Əntiqə Rəşid