Rusiya hakimiyyəti təhlükəsizliyini təmin etmək və ya vaxtında bərpa etmək üçün tədbirlər görməyən vacib infrastruktur obyektlərinə müvəqqəti idarəetmə tətbiq edə biləcək. 

Adalet.az xəbər verir ki, bu barədə Rusiya Prezidenti Vladimir Putin müvafiq fərman imzalayıb.

Sənədə əsasən, hökumət Rusiya Federasiyasındakı vacib infrastruktur obyektlərinin sahibləri onların təhlükəsizliyini təmin etmədikdə və ya bu cür obyektlər üçün təhlükəsizlik tələblərini pozduqda, onlara müvəqqəti idarəetmə tətbiq etmək səlahiyyətinə malik olacaq. Rusiya hakimiyyəti həmçinin obyektlərin bərpası gecikdikdə onlara müvəqqəti idarəetmə tətbiq edə biləcək.

Fərmana əsasən, Rusiya Federasiyasındakı vacib infrastruktur obyektlərinə yanacaq-enerji sektoru, sənaye müəssisələri, rabitə obyektləri, kommunal xidmətlər, nəqliyyat və logistika infrastrukturu və nüvə enerjisi də daxil olmaqla enerji obyektləri daxildir. Sənəd həmçinin həyat təminatı obyektlərinə, kritik dərəcədə vacib və potensial təhlükəli obyektlərə və ölkənin təhlükəsizliyinin, iqtisadi sabitliyinin və əhalinin dolanışığının təmin edilməsi üçün xüsusi əhəmiyyət kəsb edən digər obyektlərə də şamil edilir.

Sənəddə aydınlaşdırılır ki, tədbirlər müharibə zamanı Rusiyanın vacib infrastruktur obyektlərinə artan təhlükəsizlik təhdidləri səbəbindən və "Hərbi vəziyyət haqqında", "Müdafiə haqqında" və "Təhlükəsizlik haqqında" qanunlara uyğun olaraq tətbiq edilir. 

Fərman rəsmi dərc edildiyi gündən qüvvəyə minir.

Qeyd edək ki, Ukrayna son vaxtlarda Rusiyanın vacib infrastruktur obyektlərini dronlarla vurur.