Xəbər verdiyimiz kimi, dünən Cəlilabadda məktəblilər arasında baş verən dava ölümlə nəticələndi. Şagird sinif yoldaşını bıçaqlayaraq qətlə yetirdi. Çox təəssüflər olsun ki, son zamanlar tez-tez məktəblilər arasında bıçaqlı davaların şahidi oluruq. 

Bəs görən nə baş verir? Yeniyetmələrin içindəki bu aqressiya hardan qaynaqlanır?

Adalet.az-ın sualını psixoloq Zeynəb Əyyubova cavablandırıb. Psixoloq deyib ki, dövrün əsas problemlərindən biri insanların özünə niyə, nə üçün sualını verməməsidir:

“Valideyn görür ki, uşağında problem var. Bu bir yaşında da, 10 yaşında da, 20 yaşında da beləlidir. Valideynlər uşağının problemini görmədikcə cəmiyyətə fəsadlı gələcək bəxş edəcəklər. Yəni valideyn görür ki, bu uşaq normal oxumur, təhsil almır, hansısa bir konfiliktə çağırılır. Bununla mübarizə aparmaq yerinə, valideyn uşağı sərbəst buraxır. Bu sərbəst buraxılan uşaqlar da təəssüf olsun ki, ya özü kimi uşaqları seçir, ya da daha yaxşı sakit ruhlu uşaqları incitməklə məşğul olur. Yəni bir valideynə bir psixoloq olaraq çox xahiş edərək bunu demək istəyirəm ki, uşağınızda hər hansı bir problem, davranış pozuntusu varsa, uşağın başqa uşaqlardan fərqlənirsə, bunun üzərinə düşün və müalicə etdirin. Bu duyğular düzəlmədikcə cəmiyyətdə hələ belə bıçaqlanma hadisələri çox baş verəcək, haqsızlıqlar olacaq. Bu cür hadisələrin baş verməməsi üçün valideynlər əvvəldən uşaqlara nəzarət etməlidir”. 

Vasif ƏLİHÜSEYN