“Bildiyimiz kimi, noyabrın 8-də Azərbaycanın Ermənistan üzərində qələbəsinin beş illiyinə həsr olunan Zəfər paradı keçiriləcək. Azərbaycan son illərdə bir neçə dəfə hərbi paradlar keçirib. Lakin bu Zəfər paradının bir qədər daha geniş miqyasa malik olacağı gözlənilir. Çünki bu ilk yubiley paradıdır. Artıq biz qələbəmizin beş illiyini qeyd edirik”.

Bunu Adalet.az-a açıqlamasında hərbi ekspert Ədalət Verdiyev deyib. 

Onun sözlərinə görə, paradda təbii ki, bizim qələbə bayrağımız, Quru Qoşunlarının, Hərbi Dəniz Qüvvələrinin, Dövlət Sərhəd Xidmətinin, Xüsusi Təyinatlı Qüvvələrin, eyni zamanda müttəfiq və dost ölkələrin parad heyətlərinin iştirakı gözlənilir:

“Bunun vacib kompanentlərindən biri də Azərbaycan Silahlı Qüvvələrinin silahlanmasında mövcud olan və yeni əldə olunan silah və texnikalarının bir hissəsinin nümayişindən ibarət olacaq. Silah, texnika, vasitə və avadanlıqların bir hissəsi yeni əldə olunub və onlar əvvəlki paradlarda nümayiş etdirilməyib. Hesab edirəm ki, bu paradda Vətən müharibəsindən sonra əldə etdiyimiz və operativ təyinatlı “Akınçı” PUA-ları, JF-17 döyüş təyyarələri və yerli müdafiə sənayesinin istehsal etdiyi digər vasitələr ilk dəfə nümayiş etdiriləcək”. 

Ə.Verdiyev bildirib ki, bundan başqa parad zamanı Cənab Prezidentin çıxışı da olacaq:

“Bu çıxış zamanı Cənab Prezident Silahlı Qüvvələr qarşısında yeni vəzifələr qoyacaq. Çünki daha əvvəl Ali Baş Komandan tərəfindən verilən vəzifələr artıq yerinə yetirilib. Azərbaycanın ərazi və sərhəd bütövlüyü tamamilə təmin olunub. Suverenliyimiz bərpa edilib. Bundan sonra isə ordu quruculuğu sahəsində yeni vəzifələrin təyin edilməsi də gözləniləndir”.

Vasif ƏLİHÜSEYN