"Azərbaycan iqtisadiyyatı üçün ən yaxşı xəbər yeni istehsal müəssisəsinin yaradılmasıdır. Xüsusilə də AQRAR EMAL (!!!) müəssisəsinin fəaliyyətə başlaması strateji əhəmiyyət daşıyır. İqtisadçılar bunun nə demək olduğunu, həyatın onlarla müxtəlif istiqamətinə olan faydasını yaxşı anlayır". 

Adalet.az xəbər verir ki, bunu iqtisadçı Eldəniz Əmirov deyib. 

"Buna görə bu mövzuya toxundum ki, bu gün cənab Prezident İlham Əliyev İmişlidə AQRAR EMAL müəssisəsinin açılışında iştirak edib. Belə xəbərlər, yəni regionda açılan hər bir istehsal və emal müəssisəsi barədə yayılan xəbərlər və sujetlər, əslində, ölkə iqtisadiyyatı üçün ən yaxşı xəbərlərdən və ən dəyərli sujetlərdən biridir. 

Çünki yeni yaradılan real iqtisadi dəyər ölkə üçün hava-su kimi vacibdir. Regionda bir emal müəssisəsinin açılması regional məşğulluğu dəstəkləyir, qeyri-neft iqtisadi artımına təkan verir, sosial rifahı gücləndirir və dayanıqlı inkişaf üçün mühüm baza yaradır. 

Bunlar öz yerində. Amma məsələ təkcə iqtisadi deyil, hər açılan regional (emal və istehsal) müəssisə bütün ölkənin həyatına təsir edir, hətta paytaxt küçələrində tıxac artımının tempini azaldan amilə çevrilir",- deyə o bildirib. 

Vasif ƏLİHÜSEYN