Xəbər verdiyimiz kimi, bu gün Azərbaycanın müstəqillik tarixinin ən faciəli hadisələrindən olan Qarakənd faciəsindən 34 il ötür. 

Faciə ilə bağlı Adalet.az-a danışan professor Qulu Məhərrəmli bildirib ki, Qarakənd səmasında Azərbaycan vertolyotunun vurulması əlbəttə ki, bizim son dövr tariximizin

Qarabağ xronikasının ən ağır, qanlı səhifələrindən biridir:

“Çünki heç bir günahı olmayan insanların mindiyi vertolyotun səmada vurulması əlbəttə ki, təkcə düşmənçilik deyil, antiinsani, antibəşəri, əsl quldur hərəkətidir. Çox təəssüf ki, o cinayətkarlar bu günə qədər tapılmadı, amma Allah böyükdür və kütləvi bir şəkildə bu cinayətin təşkilatçıları tədricən cəzalanırlar”. 

Q.Məhərrəmli o ağır dövrdə televiziyada işlədiyini deyib:

“O vertolyotda həlak olanlarla indiki “Şəhriyar” klubunda vidalaşma mərasimi keçirilirdi. O mərasim televiziya ilə translyasiya olunurdu və orda mən də iştirak edirdim. Yəni çox ağır günlər idi. Xüsusən yaxınlarını, əzizlərini, doğmalarını itirmiş adamların hisslərini, emosiyalarını, kədərini hiss etmək, görmək çox çətin idi. Tarixdi və hesab edirəm ki, bu tarix həmişə yaddaşlarda olmalıdır”. 

Vasif ƏLİHÜSEYN