“Əzəmətli dövlətin fəxarətli vətəndaşları olur. Dövlətin əzəməti onun gücündə, suverenliyində və tarixi iradəsində öz parlaq təcəssümünü tapır. Əzəmətli dövlət yalnız sərhədləri ilə deyil, milli birliyi, siyasi sabitliyi, iqtisadi qüdrəti, beynəlxalq nüfuzu və düzgün idarəetməsi ilə seçilir. Məhz bu halda dövlət və xalq qürur hissi ilə yaşayır. Dövlətin fəxarəti həm də milli maraqları qətiyyətlə qoruması və qazandığı nailiyyətlərlə özünü göstərir. Tarix boyu bu tip nailiyyətlərimiz çox olub”. 

Adalet.az xəbər verir ki, bunu “Yeni Xətt” siyasi tədqiqatlar mərkəzinin rəhbəri Ramil Hüseynov deyib.

O, bildirib ki, bu uğurlar bizə keçmişdə dədə-babalarımızın miras qoyduğu möhkəm dəyərlərdən, cəsarətdən və yüksək mənəviyyatdan gəlir:

“Azərbaycan dövləti öz tarixi inkişaf yolunda əzəmətini müasir dövrdə daha aydın və prinsipial şəkildə nümayiş etdirdi. Tarixi zəfərimiz dövlətimizi bütün dünya dəyərləri içərisində uca edən əsas amillərdən biridir. Bu zirvə dövrü keçmişdə babalarımızın qurduğu dövlətlərin mübarizə və qürur ruhunu şərəfli tarix kimi dünyaya bəyan etdi. Dünyanın ağıllı kəsimi isə bu müdrik addımlar qarşısında barışmaqdan başqa yol tapa bilmədi. Bizim tariximizdə Atabəylər dövləti, Səfəvilər imperiyası, Azərbaycan Xalq Cümhuriyyəti və müasir Azərbaycan dövləti, Zəfər dövrü vardır”.

Vasif ƏLİHÜSEYN