Ötən gün xəbər vermişdik ki, Rusiya Xarici İşlər Naziri Sergey Lavrovun səfəri ərəfəsində İrəvanda Rusiyaya qarşı  etiraz aksiyası keçirilib və  Kiyev körpüsündən Vladimir Putinin şəklinə “qatil” sözləri yazılmış böyük pankart asılıb.

Adalet.az xəbər verir ki, Rusiya Xarici İşlər Nazirliyinin rəsmi nümayəndəsi Mariya Zaxarova İrəvanda Rusiya prezidenti əleyhinə təhqiramiz plakatlara münasibət bildirib.

Rusiya XİN nümayəndəsi bu cür təxribatların kökündə ABŞ-ın Beynəlxalq İnkişaf Agentliyi (USAID) tərəfindən ayrılmış maliyyə vəsaitlərinin dayandığını bildirib.

“Bilirsinizmi, ABŞ-ın İrəvandakı səfirliyində nə qədər adam işləyir... 2 min nəfər. Yəqin ki, onların bəziləri hələ başa düşməyiblər ki, onlar Ermənistan-Rusiya münasibətlərini pisləşdirməklə yox, Rusiya-Amerika münasibətlərini inkişaf etdirməklə məşğul olmalıdırlar. Yaxud da ola bilsin ki, Ermənistana hələ də USAİD-in köçürdüyü pullar tükənməyib. Görünür, USAID-dən ayrılmış pullar hələ də qalıb və bu cür layihələrə yönəldilib”, – deyə Zaxarova vurğulayıb.

Onun sözlərinə görə, dünyanın bir çox ölkəsində USAID-in vəsaiti ilə “heç bir yaxşı iş görülməyib” və bu təşkilat daim sabitliyi pozmağa yönəlmiş sınaqdan keçmiş sxemlər üzrə fəaliyyət göstərir.

Xatırladaq ki, 2022-ci ildə Rusiya prezidenti Vladmir Putinin İrəvan şəhərində Kiyev körpüsündə böyük portreti asılmışdı.Həmin vaxt portretdə “Biz Rusiya ilə birgəyik” sözləri yazılmışdı.

 P.S. Vallah bu rusun heç vaxt nə dostluğunu anlaya bildim, nə də düşmənçiliyini... Bu hərəkətlər nə idi, Rusiyanın "Rostex" dövlət korporasiyası Ermənistana dağlıq ərazilərdə təyyarələrin naviqasiyasına kömək edən avadanlıq verməsi nə idi?. Söhbət "Azimut" şirkətinin VOR/DME 2700 çox istiqamətli radiomayakından gedir. Avadanlıq Qarakilsə (Sisian) şəhərində quraşdırılıb və eyni anda 200-ə yaxın təyyarəni izləmək imkanına malikdir.

 Əntiqə Rəşid