“Bu gün bizi amansızcasına tənqid edirlər, daha çox böhtanlar atırlar. Həm də bizə qarşı “tabut” və “qara lent”lərin bayram edilməsindən həzz alanlar, missiyamızdan geri çəkilməyimizi tələb edənlər var. Dövlətin mətbuata qarşı törətdiyi qanunsuzluqlara qarşı gizli şəkildə sevinənlər və “Nikolu sən gətirdin” tezisini ortaya atanlar bunu qəsdən edirlər. Bunu edənlər hakimiyyət dəyişikliyi istəyən, keçmişi geri qaytarmağa çalışan, saxta vədlərlə hakimiyyəti ələ keçirməkdə maraqlı olan bəzi keçmiş mübarizə tərəfdaşlarımız seçib və məqsədli şəkildə ortaya atıblar”.

Adalet.az xəbər verir ki, bu fikirləri Ermənistanın üzləşdiyi bütün uğursuzluqların günahını Nikol Paşinyanda görən Ermənistanın 3-cü prezidenti, hazırda Respublika Partiyasının sədri Serj Sərkisyan deyib. Sarkisyan, 2018-ci ildə Baş nazir N.Paşinyanın hakimiyyətə gəlməsinə yol açdığı üçün onu günahlandıranlara nəhayət cavab verib:" Bizi ittiham edənlərə ancaq bunu deyəcəyəm: öz səhvinizi etiraf etməlisiniz, daha vacibi isə, onu düzəltməlisiniz. Şübhəsiz ki, böyük cəsarət tələb edir. Amma siz çox gözəl başa düşürsünüz ki, yeddi il əvvəl mənim məcburi istefamda həvəslə iştirak etdiniz və yaxud da tamamilə laqeyd qaldınız. Məhz bu iki səbəb sizi ondan sonra baş verən hər şeyə ortaq edir.

İndi məni günahkar çıxartmamışdan əvvəl Nikolla şərikliyinizi etiraf edin, meydanlarda hər bir iştirakınızın hakimiyyət ələ keçirən şəxsin uzunmüddətli məqsədi üçün sizdən istifadə etməsinə imkan verdiyinizi etiraf edin. Bunları etiraf etmədən məni günahlandırmaq dürüstlüyünüzü şübhə altına alır. Dürüstlüyə sahib olmaq, əlbəttə ki, son dərəcə çətindir, amma hey, başqasını günahlandırmaq ən asan işdir, eləmi? Bəs niyə asan çıxış yolu seçməyəsiniz?

Xocalı qatili olan Serj Sarkisyan son anda həm öz xalqını, həm də meydanlarda xalqının seçdiyi Nikol Paşinyanı təhqir etməkdən də çəkinmir:" Partiyamızın son qurultayında bu mövzunu müzakirə edəndə də dedim ki, mən heç kimi məcbur etməmişəm ki, gedib sürü arasında ən bərkdən anqıran eşşəyin alnından öpəsiniz. Bu, deyəsən, onlar haqqında ibrətamiz ifadəyə çevrilib. İndi son hadisələri nəzərə alaraq fikrimi davam etdirmək istəyirəm: “Alnından öpdüyünüz eşşəyi mənim qapıma bağlamayın. Hamı alnından öpdüyü eşşəyə görə cavabdehdir".

Əntiqə Rəşid