Xəbər vermişdik ki, 8 dekabrda səhər saatlarında “Heyət Təhrir əş-Şam” Dəməşqi ələ keçirərək, Əsəd rejimini devirib. Bundan sonra Bəşər Əsədin İl-76 yük təyyarəsi ilə getdiyi, lakin Suriya ərazisini tərk etmədən radarlardan itdiyi bildirilmişdi.

Əvvəlcə radarlardan itən təyyarənin vurulduğu və ya qəzaya uğradığı, Bəşər Əsədin isə öldüyü ehtimalı ortaya çıxsa da, sonradan radarları söndürərək uçan təyyarənin Moskvaya istiqamətləndiyi təsdiqləndi. Belə ki, Kreml Bəşər Əsədin Rusiyadan sığınacaq aldığını, nəhayət, media vasitəsilə elan etdi.
Baxmayaraq ki, Rusiyanın Vyananın beynəlxalq təşkilatlarındakı nümayəndəsi Mixail Ulyanov özünün Telegram kanalında Əsədin ailəsi ilə birlikdə Moskvada olduğunu xatırladaraq, “Rusiya çətin vəziyyətdə dostlarına xəyanət etmir” deyə qeyd etmişdi, amma bu fikir suriyalıları qane etmir. 

Adalet.az xəbər verir ki, bəzi Suriya nəşrləri və sosial şəbəkələrin Suriya bölməsi Əsədin ailəsi ilə birlikdə Moskvaya gəlməsi ilə bağlı rusların yaydığı məlumatı yenidən şübhə altına alıb. 
Suriya mətbuatı xəbər verir ki, əvvəla yayımlanan foto köhnədir və üzərində ərəbcə yazılar var. İkinci səbəb isə odur ki, Moskvada olan B. Əsəd niyə Rusiya mediasına açıqlama vermir, bəyanatla çıxış etmir, durumu dünyaya anlatmır? Niyə Rusiya Prezidenti  V. Putin şərqdəki ən yaxın tərəfdaşı və dostu B. Əsədlə görüşmür? Yaxud yaxın günlərdə görüşəcəyi ilə bağlı məlumat vermir?  

Qeyd edək ki, Suriya prezidenti Bəşər Əsəd və həyat yoldaşı Əsma Əsədin Moskvadan ilk görüntüləri yayıldığı bildirilib və bir foto yayımlanıb. 
Musavat.com-un məlumatına görə, paylaşılan fotoda qeyd edilib ki, Bəşər Əsəd və həyat yoldaşı Moskvadakı Beynəlxalq Hava Limanındadır. 
Lakın qısa müddət sonra həmin fotonun kəsildiyi video-görüntü yayılıb və məlum olub ki, götüntülər bir müddət əvvəl çəkilib və Bəşər Əsəd Suriyada bir xəstəxanada yatan uşağa baş çəkməyə gedir. 

Əntiqə Rəşid