05 dekabr 2024-cü il tarixdə aktyor, rejissor, Əməkdar mədəniyyət işçisi Məmmədkamal Kazımovun 95 illiyinə həsr olunmuş xatirə gecəsi keçirilib. 

Dövlət Film Fondunda keçirilən tədbirdə görkəmli teatr və kino xadimləri, ziyalılar və sənətkarın doğmaları iştirak ediblər. 
Sənət dostları Məmmədkamal Kazımovu xoş xatirələrlə yad ediblər. 

Tədbirdə çıxış edənlər - Azərbaycan Teatr Xadimləri İttifaqının sədri, Xalq artisti, Dövlət mükafatı laureatı Hacı İsmayılov, sədr müavinləri – Xalq artisti, professor İlham Namiq Kamal və Əməkdar artist, professor Azad Şükürov, Xalq artistləri Rafiq Əzimov,  Həmidə Ömərova, Əməkdar artist Yadigar Muradov Məmmədkamal Kazımovun keçdiyi zəngin həyat və yaradıcılıq yolundan, yaratdığı maraqlı obrazlardan, quruluş verdiyi sənət nümunələrindən danışıblar. Tədbir iştirakçıları sənətkarın ömür yolunu əks etdirən sərgi ilə tanış olublar. 

Maraqlı söhbətlərlə davam edən xatirə gecəsinin sonunda sənətkarın qızı Vəfa xanım Növruzova tədbirin təşkilatçılarına və
iştirakçılarına minnətdarlığını bildirib.