Xəbər verdiyimiz kimi, bu gün Zəngilan şəhəri günüdür. 2020-ci il oktyabrın 20-də Azərbaycan Prezidenti, Ali Baş Komandan İlham Əliyev xalqa müraciətində Zəngilan şəhəri və rayonun daha 6 kəndinin - Havalı, Zərnəli, Məmmədbəyli, Həkəri, Şərifan, Muğanlının işğaldan azad olunduğunu açıqlayıb. Zəngilan döyüşləri İkinci Qarabağ müharibəsində Azərbaycan Ordusunun qələbəsi ilə nəticələnən ən uğurlu Arazboyu əməliyyatlarından biridir.

Məsələylə bağlı doğulduğu rayon haqda Adalet.az-a danışan professor Qulu Məhərrəmli bunları deyib:

“Əlbəttə, ölkənin bütün vətəndaşları kimi zəngilanlılar da bu tarixə çox sevinir. Çünki düşməndən azad olunmuş torpaqlarda çox böyük quruculuq işləri gedir. Zəngilanda Ağıllı kənd inşa olunub, istifadəyə verilib və orda əhali yaşayır. Körpülər tikilir, yollar çəkilir, Zəngilanda hava limanı istifadəyə verilir. Rayon mərkəzində indi ciddi quruculuq işləri gedir, iri mədəniyyət mərkəzi tikilir. Önəmli olan odur ki, rayonun müdafiəi ciddi şəkildə möhkəmləndirilir, inkişaf prespektivi ilə bağlı planlar cızılır, rayon iqtisadiyyatını qurmaq, turizmi inkişaf etdirmək üçün çox böyük işlər görülür. Hesab edirəm ki, bunların hamısı çox ciddi məsələlərdir. Ağır gedən işlər var. Kənd təsərrüfatı işləri aparılır. Bütün bunlar hamısı müsbət tendensiyalardır. İndi əhalinin köçürülməsi tədricən həyata keçirilir. Bəzi kəndlər yerini dəyişib, bəziləri yenidən qurulub. Əlbəttə, arzuolunandır ki, daha sürətli bir proses olsun. Köçən əhalinin işlə təmin olunması, həyətyanı təsərrüfatın qurulması, genişləndirilməsi həyata keçirilsin və ora gedənlərin sayı çoxalsın. Çünki insan nəfəsi dəyəndə o yerlər bir daha canlanır. Gözəl bir tarixdi, gündü, bunu yaşayırıq. Heab edirəm ki, Zəngilanın inkişafı, onun tərəqqisi, onun yenidən bir rayon halına gəlib inkişaf etməsi Azərbaycanın sayrışan ulduzlarından birinə çevrilməsi üçün çox ciddi addımlar atılır”. 

Vasif ƏLİHÜSEYN