Ermənistan Baş naziri Nikol Paşinyan Paruyr Ovannisyanın Ermənistan xarici işlər nazirinin müavini vəzifəsindən azad olunması barədə qərar imzalayıb.
Adalet.az xəbər verir ki, onun işdən çıxarılmasının səbəbi açıqlanıb. Beləki, erməni mediası iddia edib ki, Ovannisyanın Ermənistanın BMT-dəki daimi nümayəndəsi təyin ediləcəyi ilə bağlı məlumatlar var. Ermənistanın BMT-dəki hazırkı nümayəndəsi Mher Marqaryandır ki, o, əvvəlki nümayəndələr arasında ən uzun müddətdir - təxminən altı il yarımdır vəzifədədir. Paruyr Ovhannisyan isə 2021-ci il noyabrın 9-dan nazir müavini vəzifəsini tuturdu. Bundan əvvəl o, Ermənistanın Avropa Şurasındakı daimi nümayəndəsi olub.

 Qeyd edək ki, keçmiş müavinin fəaliyyətini izləyən bəzi politoloqlar onun əslində baş nazirin qəzəbinə gəldiyini də deyirlər. Çünki, Ermənistan xarici işlər nazirinin müavini Paruyr Ovannisyan ötən ay açıqlamasında bildirdi ki, Avropa İttifaqı ilə müşahidəçilər üçün yeni mandatı müzakirə edəcəklər: “Ermənistan Azərbaycanla sülh sazişi imzaladıqdan sonra Aİ-nin mülki missiyası ilə əməkdaşlığa hazırlaşır. Ona görə də müşahidəçilər Ermənistan-Azərbaycan sərhədini tərk etməlidirlər. Biz Aİ ilə müşahidəçilər üçün yeni mandatı müzakirə edə bilərik və əməkdaşlıq mütləq sərhəd məsələləri ilə məhdudlaşmamalıdır. Avropalı müşahidəçilərlə işi davam etdirmək üçün düzgün model tapa bilərik".

 Əntiqə Rəşid