Azərbaycan və Ermənistan arasında sülh sazişinin bütün maddəıərinin razılaşdırılması çox önəmlidir və ümid edirəm ki, tərəflər arasında müqavilə imzalancaq.

Adalet.az xəbər verir ki, bunu Türk Dövlətləri Təşkilatının Baş katibi Kubanıçbek Ömüraliyev Report-un əməkdaşına IV Antalya Diplomatiya forumu çərçivəsində deyib.

O bildirib ki, sülh sazişinin üzərində hazırda iş gedir və bu vaxta qədər olan ən böyük nailiyyət Azərbaycan torpaqlarının işğaldan tam azad edilməsidir:

“Bu, Azərbaycan və bütün türk dünyası üçün önəmlidir. Maddələrin razılaşdırılması isə sülhün təminatı baxımından önəmlidir”.

Zəngəzur dəhlizinə gəlində isə Baş katib vurğulayıb ki, bu layihə əslində təkcə Azərbaycan üçün deyil, Ermənistan, İran, digər qonşu dövlətlər daxil olmaqla hər kəs üçün vacibdir:

“Əlbəttə ki, bu layihə Orta Dəhliz üçün də perspektivlidir. Əvvəllər Orta Dəhliz alternativ kimi görülürdüsə, indi artıq onun bir hissəsi kimi baxılır. Ümid edirəm ki, bu da tezliklə həyata keçiriləcək”.