ALİ SOVETİN SƏDRİ ÜÇÜN TİKİLƏN AYAQYOLU
İmişli rayon Aranlı kəndinin ibtidai sinif müəllimi məktəbdə ayaqyolu olmadığına görə dərs deməkdən imtina edib və uşaqları evə buraxıb. Nəticədə müəllimə töhmət veriblər. Xoş haldır ki, işdən çıxarmayıblar, hətta istəsəydilər həbs də edərdilər ki, tədrisi pozub. Müəllim getsin bir yesin, beş paylasın buna görə.
Müəllimləri bu qədər ucuz etməyin. Bu məsələ ilə bağlı Kamran Əsədov çox maraqlı bir yazı yazıb. Bugünki saytımızda dərc edirik. Mənim ürəyimdən keçənləri yazdığı üçün ona görə mən bu məsələyə başqa cür yanaşmıram, amma yazmaq istədiklərim var.
60-cı illərdə Ali Sovetin sədri rəhmətlik Məmməd İsgəndərov İrəvana gedibmiş. Və yol da onun doğulduğu Qubadlının kəndindən keçirmiş. Təbii ki, kənddə maşını saxlayır, camaat da yığışır başına, dərdləşirlər.
Həmin vaxtlar Ali Sovetin Rəyasət Heyətinin sədri padşah kimi tanınırdı, çünki fərmanları o verirdi.
Kəndin mətəsində camaatla xeyli dərdləşən Məmməd İsgəndərovun çişi gəlir. Həmin vaxt , elə indi də kəndlərimizin 99 faizində ictimai ayaqyolu yox idi. Gərək kiminsə qapısını döyüb xahiş edərdin ki, icazə ver, ayaqyolundan istifadə edim. Bu da ağsaqqal adam, qalır yana-yana. Kolxozun sədrini çağırır, deyir ki, bu yol kənarıdı, birdən kiməsə ayaqyolu lazım olar, gedib kimin qapısını döysün. Ayıbdı, bir ayaqyolu tikin, deyir və çıxıb gedir, yol qırağındakı meşələrin birində özünü boşaldır.
İki gün İrəvanda qalandan sonra geri qayıdır və sədrdən soruşur ki, bura ayaqyolu tikdinmi?
Sədr də İsgəndərov gedəndən sonra dörd dənə ağacı basdırır yerə, qırağına da bardanı dolayır.
Dağ kəndlərində olanlar belə ayaqyollarını onda da görüb, indi də görürlər.
İsgəndərov soruşanda ki neylədin? Qurduğu ayaqyolunu göstərib deyir:
- Hazırdı, yoldaş İsgəndərov.
İsgəndərov hirslənib deyir:
- Ə, eşşək oğlu eşşək, bu nədi?
- Tualetdi, yoldaş İsgəndərov. Bunu doldursaq sənin də dədənə bəsdi, mənim də.
Bu, anekdot deyil, olmuş hadisədi.
İndi gərək həmin məktəbdə də dörd dənə ağac tapaydılar, İmişli də pambıqçılıq rayonu, bardan çox, çəkərdilər kənarına, olaydı ayaqyolu. Həm müəllimlər istifadə edəydi, həm də şagirdlər.
XXI əsrdə yaşayırıq ey.
Yaxın zamanlarda rayonların birində nə qədər axtardım ayaqyolu tapa bilmədim. Axırda məcbur olub bir qapını döydüm, ev yiyəsi çıxdı:
- Eşidirəm, qardaş.
Utana-utana dedim:
- Olar sizin ayaqyolundan istifadə edim?
Güldü:
- Qurbandı, buyurun.
Özü də bu hadisə Azərbaycanın ən varlı rayonlarının birində, ən varlı kəndində olmuşdu. Hərdən yadıma düşəndə gülürəm.