Deputat, yazıçı, Əməkdar jurnalist Aqil Abbas Musavat.com-a müsahibə verib.

Milli Məclisin dünən, 1 apreldə keçirilən iclasından sonra millət vəkili ilə həmsöhbət olub, əvvəlcə doğum günündən danışdıq, sonra söz-sözü çəkdi və Qarabağa, Qərbi Azərbaycana, İrəvanadək uzandı.

Daha sonra yaradıcılıqdan danışdıq, yeni əsərlərin anonsunu verdi, eyni zamanda əsərlərinə filmlərin çəkilməməsinin narahatlığını bölüşdü.

Torpaqlarımızın işğal altında olduğu 30 ilə yaxın müddətdə Aqil müəllim üçün doğum günü anlayışı olmayıb.

Amma artıq beşinci ildir ki, Zəfər qazanmış ölkəmizdə dünyaya gəldiyi günün rəngi də dəyişib, mahiyyəti də. Elə dünən də parlamentdə təbriklər yağışına tutulmuşdu. Təmsil olunduğu komitədə xüsusi olaraq doğum günü ilə bağlı təbrikləri qəbul etdikdən sonra videomüsahibə istəyimizi bildirəndə, yol üstə olsa da, sözümüzü yerə salmadı.

“Şöhrət” və 1-ci dərəcəli “Vətənə xidmət görə” ordenli, çoxsaylı kitabların müəllifi dəyərli Aqil Abbasla budəfəki söhbətimiz həm də ona görə önəmli idi ki, ömür-gün yoldaşı İradə xanımla bərabər 4 günlük Qarabağ səfərindən qayıtmışdı.

Elə bu səbəbdən olduqca xoş səfər yorğunluğunu, ruhunun rahatlığını sezməmək mümkün deyildi. Millət vəkili ilə müsahibəni təqdim edirik:

Elşad Paşasoy,
Musavat.com