Bu gün 70-dən artıq siyasi partiyanın dövlət qeydiyyatından keçməsinə baxmayaraq, üzdə olan, siyasi aktivliyi ilə seçilən siyasi partiyalar azlıq təşkil edir. Qarşıdan prezident seçkilərinin gəlidiyini nəzərə alaraq demək olar ki, siyasi partiyaların bir çoxu seçki marafonunda iştirakda heç də ötən seçkilərdəki kimi maraqlı deyil. Fəaliyyətləri ilə hakim Yeni Azərbaycan Partiyasının yürütdüyü siyasətə dəstək olan iqtidaryönlü siyasi partiyaların fəaliyyətini araşdıran zaman məlum olur ki, sözügedən partiyalar aktiv fəaliyyət göstərməsə də prezident seçkilərinə hazırlıq işlərini həyata keçirir. Bir zamanlar Məşvərət Məclisi adı altında birləşən bu qurumlar indi fərdi qaydada seçki hazırlığı ilə məşğuldur. İqtidaryönlü siyasi partiyaların fəaliyyəti ilə bağlı suallarımıza cavab tapmaq üçün Azad Respublikaçılar Partiyasının sədri Kamil Seyidovdan müsahibə aldıq.
-Kamil müəllim, siyasi təşkilatların bir çoxu qarşıdan gələn prezident seçkilərinə hazırlıq işləri həyata keçirir. Nədənsə bunu iqtidaryönlü siyasi partiyalara şamil etmək olmur. Maraqlıdır iqtidaryönlü siyasi partiyalar seçkilərdə iştirak etməyəcək?
-Qarşıdan gələn prezident seçkiləri ilə bağlı siyasi partiyaların seçki hazırlığı demək olar ki, fərdi qaydada aparılır. Hər bir siyasi təşkilat bu seçkiyə hazırlaşır. Biz də iqtidaryönlü siyasi partiya olaraq seçkilərə hazırlıq işlərinə start vermişik. Yerlərdə işlər davam etdirilir. O ki, qaldı iqtidaryönlü siyasi partiyaların seçki hazırlığına, onu deyə bilərəm ki, yanvar ayında 5 iqtidaryönlü siyasi partiya sədrləri ilə bir görüş keçirdik. Bu görüşdə 2013-cü ilin iş planı, qarşıdan gələn seçkilərə hazırlıqla bağlı fəaliyyətimizin kordinasiya olunması əsas müzakirə mövzusu idi. Biz belə qərarə gəldik ki, qarşıdan gələn prezident seçkilərində iştirak edək və ənənəmizə sadiq qalaraq Yeni Azərbaycan Partiyasının namizədinin dəstəkləyək. Artıq ilkin razılıq əldə olunub. Niyyət protokolu imzalanıb. Biz 5 iqtidaryönlü siyasi partiya olaraq bir blok altında fəaliyyət göstərəcəyik. Bu yöndə yekun qərar mart ayında veriləcək.
-Yeni yaradacağınız blokun məqsədi nədir?
-Yeni yaradacağımız blok "Demokratiya Uğrunda Müqavimət Hərəkatı" adlanır. Bu hərəkata Azərbaycan Mübarizlər, Demokratik Azərbaycan Dünyası, Azad Respublikaçılar, Milli Dövlətçilik və Respublikaçılar Pariyaları daxildir. Məqsədimiz qarşıdan gələn prezident seçkilərində YAP-ın prezidentliyə namizədi, prezident İlham Əliyevin namizədliyinin dəstəklənməsi yönündə yerlərdə iş aparmaqdır. Bu hərəkatın digərlərindən fərqi ondan ibarətdir ki, burada ictimai təşkilatlar, qadın, gənclər təşkilatları və fərdlər iştirak edə biləcək. Yəni, hər hansı nüfuzlu şəxs bizə müraciət etsə ki, hərəkatda təmsil olunmaq istəyirik biz buna yox deməyəcəyik. Bir halda ki, həmin şəxs bizə prezident İlham Əliyevin namizədliyinin dəstəklənməsi üçün 100 və daha artıq səs qazandıra bilər, o halda niyə bu imkanlardan istifadə etməməliyik?
-Nədənsə son zamanlar Milli Məclisdə təmsil olunan iqtidaryönlü siyasi partiyalar sizin tədbirlərə qatılmır. Bu barədə nə deyə bilərsiniz?
-Milli Məclisdə təmsil olunan siyasi partiyalar Ana Vətən və Sosial Rifah Partiyası ilə bizim aramızda heç bir problem yoxdur. Bir müddətə qədər biz birgə fəaliyyət göstərmişik. İndiki halda onların bizim tədbirlərə qatılmaması o demək deyil ki, bizim aramızda hər hansı soyuqluq yaranıb. Bunu belə qələmə vermək absurddur. Münasibətlərimiz var və bu münasibətlər davam etdirilir.
-Kamil müəllim, bu gün YAP hakim partiyadır. Dayanıqlı sosial bazaya malik bir partiyaya sizin verəcəyiniz dəstək hansı səviyyədə ola bilər?
-Əslində bu gün üzdə olan partiyalar kifayət qədər sosial bazaya malik olan partiyadır. Məsələn, Azad Respublikaçılar Partiyası gənc olmasına baxmayaraq 9300-dən artıq insanı öz ətrafına toplayıb. Bizim 30-dan artıq yerli təşkilatımız var. Qarşıdan gələn prezident seçkilərində isə hər bir səsin öz önəmi var. Bu baxımdan biz hesab edirik ki, belə məqamda YAP-ın yanında yer almalı, YAP-ın namizədinin dəstəklənməsi yönündə iş aparmalıyıq. Bizlər YAP-ın kiçik qardaşlarıyıq. Partiya üzvlərinin hər biri prezident İlham Əliyevin apardığı siyasəti dəstəkləyir, onun yenidən prezident seçilməsi yönündə fəaliyyət göstərir. Bu isə o deməkdir ki, ARP timsalında bütün iqtidaryönlü siyasi partiyalar prezident İlham Əliyevi yenidən prezident görmək istəyir. Bütün bunlar xırda da görünsə də gücdür. Bu gücdən istifadə eləmək lazımdır. Bu gün bizi sosial bazası zəif olan partiya kimi qələmə verirlər. Mən bununla barışmıram.
-Partiyanızda sizdən savayı bir kimsə gözə dəymir. Dediyiniz güc budur?
-Azad Respublikaçılar Partiyasının İdarə Heyəti, sədrin müavinləri və belə deyək, partiya aparatı hər zaman aktiv fəaliyyətdədir. Sadəcə bu gün partiyanın maliyyə imkanlarının zəif olması həmin şəxslərin bir araya gəlməsinə, onların partiyada oturaq fəaliyyətinə təsir göstərir. Bu gün bizim maliyyə imkanlarımız üzvlülük haqları hesabına formalaşır ki, bu məbləğ də cox cüzidir. Biz bununla yalnız texniki işləri həll edə bilirik. Əslində bu gün "Siyasi Partiyalar" haqqında qanunda partiyaların maliyyələşməsi prosesi düzgün qurulmadığından biz və bizi kimi bir neçə siyasi partiyalar normal fəaliyyət göstərə bilmir. Biz təklif edirik ki, bu maliyyələşmə bütün siyasi partiyalara şamil olunsun. Yoxsa bu gün Milli Məclisdə təmsil olunan siyasi partiyalar özləri üçün qanun yazıblar. Bu imkanlardan da yalnız onlar istifadə edə bilir. Məncə bu yanaşma düzgün yanama deyil. Ən azından növbəti parlament seçkilərinə qədər bütün siyasi partiyalara maliyyə ayrılmalıdır. İmkansıza kömək etmək lazımdır, imkanlıya yox.
-Kamil müəllim, deyirsiniz maliyyə imkanlarının məhdudluğu fəaliyyətinizə mənfi təsir göstərir. Bəlkə YAP-a birləşəsiniz?
-Bu təşəbbüs YAP-dan gəlməlidir.
-Siz özünüz belə təşəbbüs etmisiniz?
-Xeyr, belə bir təşəbbüsümüz olmayıb. Ancaq mən düşünürəm ki, artıq siyasi partiyaların təkmilləşməsi prosesi gedir. Son zamanlar bir çox partiya fəaliyyətini dayandırıb. Üzdə qalan partiyalar isə digərləri ilə əməkdaşlıq edərək bu və ya digər şəkildə fəaliyyət göstərir. Bu gedişat onu göstərir ki, yaxın müddətdə sosial, maliyyə imkanları zəif olan partiyalar sıradan çıxacaq. Yaxın on ildə 4-5 siyasi partiya qalacaq. Belə olan halda biz də YAP-la birləşmək yönündə qərar qəbul edə bilərik.
Ədil Ədilzadə