Bakı Xoreoqrafiya Akademiyasının (BXA) dəvəti ilə Rusiyanın  A. Y. Vaqanova adına Rus Baleti Akademiyasının Musiqi sənəti kafedrasının I dərəcəli müəllimi Kseniya İvanova  akademiyanın tam orta təhsil pilləsinin şagirdlərinə Ritmika fənni üzrə ustad dərsləri keçirib.

Ustad dərsləri zamanı K. İvanova tərəfindən şagirdlərə Ritmika və Fortepiano ifaçılığı fənləri üzrə nəzəri və təcrübi izahlı təhlillər verilib. 

Spesifik sahənin incə metodları şagirdlərə aşılanıb, sahə yenilikləri barədə məlumat verilib, ustad dərslərində şagirdlərin fəallığını artıran fənn üzrə təkmilləşdirilmiş hərəkətlər nümayiş olunub.

Eyni zamanda,  Kseniya İvanova sinif otaqları və dərs zalları ilə tanış olub.

Ustad dərsləri yekunlaşdıqdan sonra K. İvanova və BXA-nın müəllim heyətinin iştirakı ilə dəyirmi masa ətrafında müzakirələr aparılıb. Müzakirələr zamanı tədrisin təkmilləşdirilməsində yeni dərs vəsaitlərinin ərsəyə gətirilməsi, təhsildə qarşıya çıxan problemlərin aradan qaldırılması üçün atılacaq addımlar, müəllim-şagird münasibətləri və digər mövzular ətrafında geniş fikir mübadiləsi aparılıb.