"Körpənin doğulduqdan sonra mümkün qədər erkən ana südü ilə qidalandırılması tövsiyə olunur".

Adalet.az xəbər verir ki, bunu canlı yayımda Səhiyyə Nazirliyi Elmi-Tədqiqat Pediatriya İnstitutunun pediatrı Aygün Məmmədova deyib.

Onun sözlərinə görə, ananın və körpənin vəziyyəti imkan verirsə, uşaq doğulduqdan sonra ilk bir saat ərzində döşə qoyulmalıdır:

"İlk bir saat ərzində döşə qoyulma həm ananın, həm də körpənin sağlamlığı üçün əhəmiyyətlidir. Döşə qoyulduqda anada oksitosin hormonu ifraz olunur. Bu hormon uşaqlığın yığılmasına və qanaxmanın qarşısının alınmasına kömək edir".

A.Məmmədova qeyd edib ki, ana südü ilə qidalandırmanın qadın sağlamlığı üçün də uzunmüddətli faydaları var. Belə ki, ana südü ilə qidalandırma yumurtalıq və süd vəzi xərçəngi, eləcə də II tip şəkərli diabet riskinin azalmasına kömək edə bilər.

Pediatr ilk günlərdə körpənin saatla əmizdirilməsinin vacib olmadığını vurğulayıb.

"İlk sutkalarda analara xüsusi rejim tətbiq etməyi, saatla qidalandırmağı tövsiyə etmirik. Körpənin ehtiyacı olduqda döşə qoyulması məsləhətdir. Ümumilikdə isə sutka ərzində 8-12 və daha çox dəfə qidalandırılmalıdır".