Son bir həftədə ölkə gündəmini zəbt edən məsələlərdən biri də ictimai nəqliyyatda gedişhaqqının artırılmasıdır.  Ümumiyyətlə, qiymət artımı hər zaman əhali tərəfindən narazılıq doğursa da,  aidiyyatı qurumlar bu artımın hansı səbəbdən baş verdiyini əsaslı izah etməyə çalışırlar. 

Mövzu ilə bağlı Adalet.az-a açıqlama  verən nəqliyyat məsələləri üzrə ekspert Aslan Əsədov qiymət artımının yalnız müasir tələblərə cavab verən nəqliyyat vasitələri üçün keçərli olduğunu vurğulayıb:

“Qiymət artımı ilə bağlı onu demək olar ki, Bu işlərə birbaşa olaraq Tarif Şurası nəzarət edir. Ancaq görünür, burda bəzi məqamlar var ki, həmin məsələyə nəqliyyat sahəsinə cavabdeh qurum bu prossesləri həyata keçirir. Məsələ ondadır ki, bu gün Bakı şəhərində və bölgələr üzrə kifayət qədər daşınmanı həyata keçirən subyektlər var. Bu da o deməkdir ki, hansı ki kartla işləməyən avtobuslar var, onlar yenə də öz manevrlərini edəcəklər. Kartla işləməyən avtobuslar üçün qiymət dəyişməyəcək. Kartla fəaliyyət göstərən marşurtlar isə şəhər infrastrukturuna aiddir. Yəni burda məcbur deyil ki, kimsə gedib bahalı avtobus alıb, məkana gətirsin. Bu kimi amillər ölkədə bu və digər formada nəqliyyatda gedişlərin tənzimlənməsinə, gedişhaqqıların artmasına dəlalət edir. Burada əsas məsələ sərnişindaşımadır. Qiymət artımına əhalinin belə reaksiyası isə gözlənilən idi. Gündəlik ictimai nəqliyyatdan istifadə edən sərnişinlər üçün bu böyük dəyişiklikdir.Metroda da kifayət qədər rəqabət var, yəni tabelilik var. Demək olar ki, kifayət qədər yeni metrostansiyaların açılması gözlənilir. Bu sahədə də ciddi addımlar atılır. Ancaq effektivlik hələ çətindir”.

Əntiqə Kərimzadə