28 Noyabr 2023 13:32
1351
ELM VƏ TƏHSİL

MÜƏLLİMLƏRİ  YENİCƏ MÜDAFİƏ ETMİŞDİK Kİ, TƏZƏ HOQQA ÇIXDI…

Mən həmişə müəllimin tərəfində olmuşam, müəllim  lap haqsız olsa da. İpə-sapa yatmayan övladlarımızdan adam düzəltməyə  çalışan  müəllimlərdir. Yazmışam, yenə yazıram – bu qədər az maaşla Azərbaycanın  gələcəyi  üçün ağıllı, tərbiyəli, savadlı vətəndaş yetişdirən müəllimlərin  hamısı Milli qəhrəmandır. 

Bu yaxınlarda bir olay olmuşdu, bir məktəbin şagirdinin döyüldüyü  haqda  məlumat  yayılmışdı. Sosial şəbəkələr  partlayırdı, nə söz qalmadı  müəllimlər haqqında yazılmasın.

Sonra Daxili İşlər Nazirliyi  məsələyə aydınlıq gətirdi ki, şagird  döyülməyibmiş, akt zalında  başqa bir  şagirdlə toqquşubmuş və sair və ilaxır. Aranın sakitləşməsindən heç iki gün keçmədi məlum oldu ki, Quba-Xaçmaz regional təhsil mərkəzinin rəhbəri məktəbdə bir oğlan uşağını  saçı  uzun olduğuna görə döyüb. Nəticədə istefa  verməyə  məcbur olub.

Mən də uzun  saç saxlamağı  xoşlayardım, amma buna görə müəllimlər məni döyməzdi. Hərdən mehribancasına  başımı  sığallayıb deyərdilər:

-Bu saç sənə yaraşr, amma məktəbliyə yaraşmır.

Mən də müəllimlərin  sözünü yerə salmazdım, gedib  saçımı kəsdirərdim və gözləyərdim ki, bir daha  nə vaxt uzanacaq. Bu da bir-iki ay  çəkərdi.  

Layiq olmayan  adamları yüksək vəzifəyə təyin edəndə nəticəsi də belə olar. Bu ərköyün  müdir təkcə müəllim  adına ləkə gətirməyib, böyük bir nazirliyin adına ləkə gətirib. 

Şəkildən göründüyü kimi, yaraşıqlı gəncdir. Adamı vəzifəyə qoyanda  yaraşığına görə yox, qabiliyyətinə görə  qoyarlar.
Yaraşığa görə olsa Alen Delon ömürlük  Fransanın  prezidenti olardı.