Əlbəttə, bu suala birmənalı cavab vermək mümkün deyil. Ən azından ona görə ki, ölkəmizdə tez - tez həm ərzaq, həm kənd təsərrüfatı, həm də sənaye mallarının qiymətləri baalaşır.

Məsələn, qarabaşağın bir kiloqramın bir ay əvvəl  bir manata alırdıq, indi onu  1 manat 20 qəpiyə alırıq. Hələ ola bilsin , bir aydan sonra qiyməti daha da artsın. Eyni zamanda iki- üç ay bundan qabaq ölkəmizə xaricdən idxal olunan 5 litrlik zeytun yağı 47 manat idi. İndi isə 60 manat! Noldu, birdən - birə onun qiyməti 13 manat qalxdı? Bunlar kim və niyə bahalaşdırır? Bu, görünməyən əllər nə vaxt kəsiləcək!.Suallar  çoxdur, amma ona düz- əməlli cavab verən yoxdur.Təkcə ərzaq malları, yağlar deyil, bütün bostan- tərəvəz məhsullarının qiymətləri bahalaşıb.

Azərbaycanda elə bil ki, Kənd Təsərrüfatı Nazirliyi yoxdur. Və bazarlarda ucuzluq yaratmaq üçün heç bir addım atmır. Sovet dövründəki kooperativ ticarət bərpa olunmalıdır. Dövlət ucuz qiymətə fermerdən həmin məhsulları  almalı və əhaliyə də ucuz qiymətə satmalıdır. Yoxsa, alverçilər həmin məhsulları  qəpik- quruşa alıb, gətirib camaata üç - dörd manat baha qiymətə satmaz.

Məhsullar beş - altı əldən keçir.Kəndli qalır kənarda, alverçilər qaz vurub, qazan doldururlar.Bu nə vaxt qədər belə olacaq? Bu sualın cavabını biz yox, aidiyyəti qurumlar verməlidirlər!

Emil Faiqoğlu