Türkiyə Prezidenti Rəcəb Tayyib Ərdoğanın Birləşmiş Millətlər Təşkilatının Baş Assambleyasına qatılmaq üçün ABŞ-yə səfəri və Trampla Ağ Evdə planlaşdırdığı kritik görüşü beynəlxalq mətbuatda geniş işıqlandırılıb. 

Adalet.az xəbər verir ki, görüş Ankara-Vaşinqton münasibətlərində yeni səhifə kimi şərh edilib. 

ABŞ Prezidenti Donald Tramp və Prezident Rəcəb Tayyib Ərdoğan Ağ Evdə baş tutan görüşdə ikitərəfli münasibətləri və Qəzza, Suriya, Ukrayna-Rusiya müharibəsi kimi qlobal məsələləri müzakirə ediblər.

Ərdoğan səfərdən məmnunluğunu ifadə edərkən, Tramp isə Ərdoğanla çoxdankı dostluq münasibətlərinə diqqət çəkib. Təxminən iki saat yarım davam edən görüş müsbət tonda keçib.

Tramp Türkiyənin almaq istədiyi müdafiə sistemləri ilə bağlı müsbət nəticələr əldə ediləcəyinə inandığını dilə gətirib. Mətbuatda yayılan məlumatlara görə, görüşün gündəmində F-35 və F-16 təyyarələri ilə yanaşı, Patriot sistemləri də ön planda olub.  

Tramp Ərdoğanın Ukrayna-Rusiya münaqişəsində vasitəçilik potensialını vurğulayıb. CNN İnternational və Sky News kimi xəbər agentlikləri yazır ki, Tramp bu mövzuda Ərdoğana güvəndiyini ifadə edib. 

Vasif ƏLİHÜSEYN