İsrailin İranın mərkəzi əyalətinin Xomeyn şəhərinə endirdiyi zərbələr nəticəsində İslam İnqilabı Keşikçiləri Korpusunun (SEPAH) azı səkkiz əsgəri həlak olub.

Adalet.az xəbər verir ki, bu barədə İran İnqilabı Keşikçiləri Korpusunun bəyanatında deyilir.

“İyunun 16-da səhər saatlarında İsrailin qeyri-sabitliyi təhrik edən hücumları nəticəsində Xomeyni müdafiə edən SEPAH-ın altı hərbçisi və "Bəsic"in iki döyüşçüsü müdafiə missiyasını yerinə yetirərkən öldürülüb", - SEPAH qeyd edib.

Xatırladaq ki, iyunun 13-nə keçən gecə İsrail ordusu “Yüksələn Aslan” adlı genişmiqyaslı əməliyyata başlayıb. Bu əməliyyat çərçivəsində Hərbi Hava Qüvvələri hərbi obyektlərə və İranın nüvə proqramının obyektlərinə zərbələr endirir.

İsrail Hərbi Hava Qüvvələri İranın müxtəlif bölgələrində, o cümlədən Tehranda bir neçə dəfə hücumlar həyata keçirib və burada İran Silahlı Qüvvələrinin Baş Qərargah rəisi və İslam İnqilabı Keşikçiləri Korpusunun komandiri də daxil olmaqla bir neçə yüksək rütbəli iranlı hərbçi, həmçinin bir sıra nüvə alimləri həlak olub. Ölkədəki bir neçə nüvə obyekti, o cümlədən Natanz və Fordoda, həmçinin İranın ölkənin müxtəlif bölgələrindəki hərbi mövqeləri də vurulub.