Təbii ki, bayram günləri insanlar ya gəzməyə, ya da  qohum - əqrəbasını  ziyarət etməyə  gedir.

Belə olanda şəxsi avtomobillə yanaşı, ictimai nəqliyyatdan - metrodan və avtobuslardan istifadə edilir! Yanvarın 1- də də  biz  bir dostumuzgilə  baş çəkdik. Onlara getmək üçün " Azadlıq"  metrostansiyasından  çıxıb, 71 nömrəli avtobusa minməliydik. Stansiyadan çıxaraq həmin avtobusa yaxınlaşdıq.Avtobusu dayanacaqda görüb sevindik və onun salonunda əyləşdik. Düşündük ki, bir neçə dəqiqədən sonra avtobus tərpənəcək. Heç sürücü də  sükan arxasında  yox idi.

Həmişə beş dəqiqədən  sonra  avtobus  tərpənmirdi. Amma bu dəfə 20 dəqiqə gözlədik, tərpənmədi.Sürücü gəlib sükan arxasında əyləşdi, yenə avtobus hərəkətə gətirilmədi. Axırda salondakı sərnişinlər təngə gəlib dedilər ki, qardaş maşını  niyə sürmürsən, 20 dəqiqədir gözləyirik? Sürücü isə dilləndi ki, bayramla əlaqədar olaraq iş yoldaşlarımızın çoxu işə çıxmayıb, xətdə cəmi üç avtobus var, hələ mən bir az tez çıxıram.    

Düz yarım saatdan sonra avtobus hərəkətə gəldi.  Bax , bayram günləri bəzi avtobus marşrutları belə yarıtmaz  fəaliyyət  göstərib.  Ona görə də Yerüstü Nəqliyyat Agentliyi bu məsələləri diqqətdə saxlamalı,  problemin həll edilməsinə nail olmalıdır!!!

Emil Faiqoğlu