Artıq fevral ayı başa çatır. Noyabrın 15-dən verilən istilik aprelin 15- nə kimi davam edəcək. İndi, gəlin görək " Azəristiliktəchizat" a işlətdiyi istiliyə görə , əhali necə pul ödəyir! Təbii ki, bu suala birmənalı cavab vermək mümkün deyil.

Çünki borcun ödəyən də var, ödəməyən də!  Borcla bağlı" Azəristiliktəchizat"artıq  əhaliyə xəbərdarlıq da edib. Bu barədə binaların bloklarının qarşısına  xəbərdarlıqla bağlı məlumat yapışdırılıb. Elə bizim yaşadığımız binada da belə xəbərdarlıqlar var. Bizim sakinlərin  60 faizi bu borcu ödəməyib. Elə abonent var ki, 400- 500 manat borcu var. İmkanı olsa da, pul vermir ki, vermir. Bilirlər ki, işıq, qaz, su kimi  xətti kəsmək olmur. Amma xəbərdarlıqda deyilir ki, pulu vermədiyinə görə, hissə- hissə binalarda istilik kəsiləcək.

Belə çıxır ki, qurunun oduna yaş da yanacaq. Bəs borcu ödəyən abonentlər niyə digərlərinin əziyyətin çəkməlidir? Məgər bu, ədalətsizlik deyilmi? Əlbəttə, ədalətsizlikdir. Gəlin, onunla razılaşaq ki,  məlum quruma borclar vaxtında ödəməyəndə  onlar da "Azəriqaz" , " Azərsuya" olan borclarını ödəyə  bilmir, üstəlik də işçilərin əməkhaqqını verməkdə  çətinlik çəkir. İndi, ay hörmət abonentlər işlətdiyiniz  istiliyin  pulunu ödəyin də! Sizə görə niyə başqaları əziyyət çəkməli və hüquqları tapdanmalıdır?!

Emil Faiqoğlu