Heç kimə sirr deyil ki, bəzi qəzalar dumanlı hava şəraitində baş verir. Belə ki, sürücülər uzaq məsafəni qatı dumanda görmür, üstəlikdə sürət həddini aşır və  bu vaxt belə ağır qəzalar qaçılmaz olur.

Bir neçə ay bundan əvvəl respublikanın avtomobil yollarında qatı dumanda  belə qəza yaranda, nəticədə zəncirvari qəza baş verdi, on dörd avtomobil bir- biri ilə toqquşdu, nəticədə ölənlər və xəsarət alanlar oldu. Çünki bir çox sürücülər dumanlı havanı nəzərə almadı.Yəni sürücü səhlənkarlığı oldu. Bu gün də  respublikanın avtomobil yollarında tez - tez  duman olur.

Üstəlik də onu nəzərə alsaq ki, qarşıdan Novruz bayramı gəlir və yollarda hərəkətin intensivliyi artacaq, bax onda sürücülər daha diqqətli olmalıdır. Baş Dövlət Yol Polisi İdarəsinin ictimaiyyətlə əlaqələr şöbəsinin inspektoru Elvin Hacıyev  dumanlı hava şəraiti ilə bağlı bir  daha sürücüləri maarifləndirmək bildirir ki, dumanlı havada hər bir sürücü məsuliyyətli olmalı, avtomobilin duman faralarını yandırmalı, ara məsafəsi saxlamalı, sürət həddini aşağı  salmalı,  belə çətin hava şəraitində tez- tez manevr etməməlidirlər. Təbii ki, bayram günlərində  respublikanın müxtəlif bölgələrinə gedənlərin sayı daha da çoxalacaq. Ona görə də hər bir hərəkət iştirakçısı bu tövsiyələrimizi nəzərə  almalı və yol hərəkəti qaydalarına  riayət etməlidir. Belə olsa, hər bir sürücü və sərnişin mənzil başına sağ- salamat çatar!

Emil Faiqoğlu