Ömrünü Azərbaycan kino və teatr sənətinə həsr etmiş  Xalq artisti Kamal Xudaverdiyevin anım günüdür. Aktyor  3 may 1938-ci ildə Bakıda anadan olub.

O, həm Akademik Milli Dram Teatrının aparıcı aktyoru,  həm də lirik psixoloji üslublu məktəbin nümayəndəsi idi . Aktyor kimi məhz həmin janrlı filmlərdə tamaşaçı rəğbəti qazanmışdı. Onun teatr həyatı  qısa bir  zamanı çıxmaq şərti ilə Akademik Milli Dram Teatrı ilə bağıdır.

1965-ci ildə ali təhsilini başa vuran Kamal Xudaverdiyev Akademik Milli Dram Teatrının baş rejissoru Tofiq Kazımovun təklifi ilə oktyabr ayının 1-də truppaya ştata götürülüb.

Aktyor  teatrda yaratdığı presonajlarla  yanaşı, kino sənətində də unudulmaz obrazlarla yadda qalıb. O,  "İstintaq davam edir" (Çingizov), "Ən vacib müsahibə" (Həsənov), "Dağlarda döyüş" (Rüstəmov), "Nəsimi" (Yusif), "Abşeron" (Əli), "Üzü küləyə" (kombinat müdiri), "Adanı özünlə apara bilməzsən" (ata), "Otel otağı" (alim), "Dədə Qorqud" (ata) filmlərində xaraktercə fərqli obrazlara çəkilib. Onu tamaşaçıya sevdirən məqamlardan birisi  xarizması və  dəyişkən xarakterli  obrazları mükəmməl  canlandırması idi. Tamaşaçını inandıra bilirdi. 

Əlbəttə çəkdiyi zəhmət də əbəs deyildi. Aktyor tamaşaçı sevgisi ilə yanaşı, rəsmi şəkildə də dəyərini alırdı. O, 1982-ci ildə Azərbaycan Respublikasının əməkdar artisti, 22 may 1991-ci ildə xalq artisti fəxri adları ilə təltif olunub. Prezident təqaüdçüsü idi.
Səhhətində yaranan problemlər ona səhnəyə çıxmağa imkan vermir.  O, ömrünün son səhnəsi olan bu fani dünya ilə vidalaşır-  23 aprel 2008-ci ildə ürək çatımazlığından vəfat edir. 

Əntiqə Kərimzadə