Türkiyə, Səudiyyə Ərəbistanı və Pakistan Yaxın Şərqdə təhlükəsizlik balansını dəyişdirəcək Məkkə Sazişini imzalayıblar.

Adalet.az xəbər verir ki, bu  barədə Türkiyə mətbuatı yazıb. 

Bildirilir ki, Sazişə əsasən, alyansın hər hansı bir üzvünə edilən hücum sazişin bütün tərəflərinə edilən hücum kimi qiymətləndiriləcək. Bu baxımdan, saziş NATO-nun 5-ci maddəsinə bənzəyir. Üçlük ittifaqı, üzv ölkələrin sahib olduğu fərqli güc elementləri səbəbindən də əhəmiyyətlidir. Türkiyə bölgədəki hərbi gücü, Səudiyyə Ərəbistanı regional və iqtisadi çəkisi, Pakistan isə nüvə gücü ilə seçilir.

Pakistan nüvə silahına malik yeganə müsəlman ölkəsidir. Pakistan və Səudiyyə Ərəbistanı həmçinin 2025-ci il üçün birgə müdafiə müqaviləsi elan ediblər ki, bu da beynəlxalq ictimaiyyətin diqqətini cəlb edib. 

Bu tarixi addım Yaxın Şərqdə hərbi gərginliyin artdığı bir vaxta təsadüf edir. ABŞ və İran arasındakı münaqişənin kəskinləşməsi Körfəz ölkələrinə təsir göstərərək Hörmüz boğazı və Qırmızı dəniz vasitəsilə dəniz nəqliyyatında fasilələrə səbəb olub.

Bölgədəki son hadisələrdən sonra yeni bir təhlükəsizlik strukturunun yaradılması uzun müddətdir müzakirə olunur. Məkkə Sazişi ilə Türkiyə, Səudiyyə Ərəbistanı və Pakistan hərbi təhdidlərə qarşı çəkindirməni artırmağı və üç ölkənin ərazi təhlükəsizliyini təmin etməyi hədəfləyirlər.