“Hicablı qızların oxuduğu məktəblərdə siniflərdən çıxarılması və məktəbə buraxılmaması Azərbaycan Respublikası Konstitusiyasının və Azərbaycan Respublikası Təhsil Qanununun, ən başlıcası, vətəndaşın təhsil almaq hüququnun pozulması deməkdir”. 

Adalet.az xəbər verir ki, bunu filologiya üzrə fəlsəfə doktoru Bilal Alarlı deyib.

“Açığını deyim, mən də hicabın əleyhinəyəm, xüsusən məktəblilərin hicaba bürünməsi yolverilməzdir. Amma bunu hicablı şagirdləri təhsildən məhrum etməklə həyata keçirmək düzgün deyil. Valideynlər məktəbə dəvət edilməli, fərdi qaydada söhbətlər aparılmalıdır. Məktəbli formalarının zorla tətbiqi isə imkansız ailələri çətin vəziyyətdə qoyur. Təsəvvür edin, iki-üç uşağı oxuyan və 300-400 manat civarında maaş alan valideyn dəyərlərə, qələmə, alboma, çantaya çəkilən xərcləri güclə çatdırdığı halda, ondan tələb olunur ki, 200-300 manat da paltara versin. Sovet hökuməti belə eləmirdi, əksinə, imkansız ailələrin övladlarını paltarla, dərslik avadanlıqları ilə pulsuz təmin edirdi.Hayıf o gözəl təhsil sisteminə, qədrini bilmədik!”, - deyə o, bildirib. 

Vasif ƏLİHÜSEYN