Avropa İttifaqı Şurası “Moldovadakı sabitliyi pozduğuna görə” bir təşkilat və beş şəxsə qarşı sanksiyaların genişləndirilməsini təsdiqləyib.

Adalet.az Rusiya mediasına istinadən xəbər verir ki, məhdudiyyətlərə Moldova Respublikasının Qaqauziya Muxtar Ərazi Qurumunun rəhbəri Yevgeniya Qutsul, siyasətçilər Yuri Kuznetsov, İlya Uzun və Mixail Vlah, həmçinin Avrasiya ANO-nun qurucusu Nelli Parutenko daxildir. Avrasiya təşkilatının özü də sanksiyalara məruz qalıb.
Sanksiyalar qarşıdan gələn prezident seçkiləri və oktyabrın 20-də Moldovanın Aİ-yə daxil olması ilə bağlı referendum fonunda qüvvəyə minib.

“Sabitliyi pozan” sanksiyalar rejimi ötən ilin aprelində təsdiq edilib və Aİ-nin fikrincə, Moldovanın sabitliyini təhdid edənlərə qarşı yönəlib. İlk siyahıya müxalifətçi siyasətçi İlon Şor da daxil olmaqla 11 nəfər daxil olub. Sanksiyalar arasında aktivlərin dondurulması və Aİ ölkələrinə giriş qadağası daxildir və məhdudiyyətlər 29 aprel 2025-ci ilə qədər qüvvədə olacaq.