Ankarada yaşayan azərbaycanlıların mənəvi birliyinə və həmrəyliyinə xidmət edərək,  mütəmadi olaraq dəyirmi masalar, seminarlar və konfranslar keçirən  “Azaflı Sosyal Yardım Ve Kültür  Derneği”ndə   8 Noyabr - Zəfər Gününün 5 illiyi münasibətilə tədbir keçirilib.

Tədbirdə vətənimizin müstəqilliyi, suverenliyi və torpaqlarımızın ərazi bütövlüyü uğrunda şəhid olmuş vətən övladlarının əziz xatirəsi bir dəqiqəlik sükutla yad edilib,  İstiqlal marşı və Azərbaycanın himni səsləndirilib.

Tədbiri  “Azaflı Sosyal Yardım Ve Kültür Derneği”nin başkanı Arzuman Azaflı  açaraq   Azərbaycan xalqının, dünyanın müxtəlif ölkələrində yaşayan soydaşlarımızın olduqca əlamətdar, tarixi bir günün - müstəqil Azərbaycan tarixinin qəhrəmanlıq səhifəsinə qızıl hərflərlə yazılmış Zəfər Gününün 5-ci ildönümünü böyük təntənə ilə qeyd etdiyini vurğulayıb.

“Qarabağ səlnaməsi” filmi nümayiş etdirildikdən sonra Ankara Universitetinin professoru Toğrul İsmayıl çıxış edərək 44 günlük Vətən müharibəsində Azərbaycan Ordusunun misilsiz qəhrəmanlıq göstərməsini, ölkəmizin ərazi bütövlüyünün bərpa edilməsini, həmin dönəmdə Azərbaycanın hər yerində və ölkə hüdudlarından kənarda yaşayan soydaşlarımızın dövlətimizin və ordumuzun yanında olmasını,  bu tarixi Zəfərə öz mənəvi dəstək göstərməsini tarixi faktlar əsasında işıqlandırıb. Toğrul İsmayıl  çıxışında Müzəffər Ali Baş Komandan, Prezident İlham Əliyevin rəhbərliyi ilə Azərbaycan xalqından güc alan Silahli Qüvvələrimizin 44 gün davam edən Vətən müharibəsində möhtəşəm və inamlı qələbə qazanmasına toxunaraq, bu Qələbənin yalnız silah gücü ilə deyil, ulu bir xalqın bir yumruq kimi birləşməsi, Ordunun peşəkarlığı, rəhbərin dəmir yumruğu və iradəsi, hər bir vətəndaşımızın basılmaz, ölməz Vətən sevgisi ilə mümkün olduğunu diqqətə çatdırıb. 

“Azaflı Sosyal Yardım Ve Kültür Derneği”ndə 8 Noyabr - Zəfər Gününün 5 illiyi münasibətilə keçirilən tədbirdə Hacettepe Universitetində Tarix fakültəsi üzrə bakalavr və magistr təhsilini tamamlamış Kursat İsmayılın “Azerbaycan Modernleşmesi” kitabının təqdimatı keçirilib.

Tədbirdə tarixçi alimlər iştirakçıların çoxsaylı suallarını cavablandırıblar.

Hikmət Xudiyev
Ankara