adalet.az header logo
  • Bakı 15°C
  • USD 1.7
29 Yanvar 2023 13:42
278
GÜNDƏM

Bizim silahımız əllərimiz və ürəyimizdir... - Zaur Əliyev yazır

Bunu çox az adam bilir. Milli Qəhrəman Mübariz İbrahimov ermənilərlə döyüşə gedən günü təkbaşına neçə neçə düşməni məhv edəndən sonra onu onu mühasirəyə alırlar. Erməni zabiti Kalaşnikov avtomatını onun üzərinə tuşlayır və təslim olmağı deyir. Mübariz əlində heç bir silah olmadan onun üzərinə gedəndə ermənilər bir neçə yerdən onu güllələdilər. Mübariz onun üzərinə yönlənmiş Kalaşnikovlardan qorxmayaraq son nəfəsinə qədər savaşmağı seçdi. Dünən də İran adlanan yerdə səfirlikdə terrorçunun əlində avtomat kalaşnikov olmasına baxmayaraq Vasif Tağıyev də qorxmadan, ölümü gözə alaraq onun üzərinə getdi. Onun əlindən silahı ala bildi və yaralı olmasına baxmayaraq səfirlikdə olanların nəinki həyatını xilas elədi, düşməni Azərbaycan ərazisi sayılan binadan çıxarda bildi. Bu nəyi göstərir.

Azərbaycanda Mübarizlər,Vasiflərin üzərinə silahla gəlmək olmaz. Silahla bizi qorxutmaq olmaz.

Şuşa fatehləri olan oğullarımız düşmənin avtomat kalaşnikovla atdığı güllələrdən yaralanıb, qanı axa axa düşməni əlləri ilə boğub öldürüblər, 44 günlük müharibədə neçə neçə düşmən əllərində avtomat olmasına baxmayaraq bizim igidlər tərəfindən əli yalın olaraq məhv ediliblər.

Bizim xalq budur. Bir Mübariz ölər, bir Vasif doğular. Bir əsgər şəhid olar, yüz əsgər doğular..

Ona görə bütün dünya bilməlidir...Bizim üstümüzə silahla gəlməyin. Bizim silahımız əllərimiz və ürəyimizdir...