Bakı Xoreoqrafiya Akademiyasının (BXA)  nümayəndə heyəti - Xarici əlaqələr üzrə prorektor, Xalq artisti Təranə Muradova və Baletmeyster sənəti kafedrasının müdiri Lyudmila Həsənova, eləcə də akademiyanın tələbələri Qazaxıstanın paytaxtı Astanada keçirilən Böyük Vətən Müharibəsinin Qələbəsinin 80 illiyinə həsr olunmuş Gənc xoreoqrafların beynəlxalq festival-müsabiqəsinə qatılıb. 

Müsabiqə çərçivəsində T. Muradova Qazaxıstanın Milli Xoreoqrafiya Akademiyasında ustad dərsləri keçirib. 

Ustad dərslərində Özbəkistan, Qazaxıstan, Qırğızıstan, Rusiya və Belarusun müəllim-tələbə heyəti iştirak edib. O, ustad dərslərində “Uzundərə” rəqsini  tədris edib. T. Muradova keçirdiyi ustad dərslərinə və Gənc xoreoqrafların beynəlxalq festival-müsabiqəsində rəhbər kimi iştirakına görə mükafatla təltif edilib. 

Eyni zamanda, BXA-nın nümayəndələri  festival-müsabiqə  daxilində təşkil olunmuş dəyirmi masada iştirak edib. 
Dəyirmi masa ətrafında çıxış edən L. Həsənova akademiyanın yaranma tarixi, fəaliyyəti, yerli və beynəlxalq əlaqələri barədə ətraflı məlumat verib. 

MDB ölkələrinin müxtəlif ali təhsil müəssisələrinin tələbələrinin iştirak etdiyi festival-müsabiqəyə qatılan tələbələrimiz də böyük uğurla çıxış edib. Tələbələrimizdən  biri  Xəyal Pənahov  “Ən yaxşı ifa (ansambl)” mükafatına layiq görülüb. Xatırladaq ki, Lyudmila Həsənova sözügedən müsabiqədə münsiflər heyətinin üzvü olub.