Fikrət Əmirov - 100

Gəncənin   dünya  mədəniyyəti və incəsənətinə   bəxş etdiyi  ən görkəmli   şəxsiyyətlərdən  biri də  bəstəkar  Fikrət Əmirovdur.  SSRİ  xalq artisti, SSRİ və Azərbaycan  SSR  Dövlət Mükafatları  laureatı, bir sıra digər fəxri adların və  sənət mükafatlarının müəllifi  Fikrət  Əmirovun anadan  olmasının  100-cü ildönümüdür.      

Yubiley münasibətilə dövri mətbuatda dərc olunan  təbrik və təəssüratlar    dahi bəstəkarın Gəncə səfərlərindən  birində  onunla söhbət  zamanı  keçirdiyim hissləri,  aldığım  təəssüratları  yenidən yaşatdı.    

Həsən Həsənovun Gəncəyə rəhbərlik etdiyi 1979-1980-ci illər  qədim şəhərin  yüksəliş səlnaməsində çox şərəfli səhifə  təşkil edir. O illərdə  Gəncə  respublikada keçirilən mədəni tədbirlərin mərkəzinə çevrilərdi və  bu  görüşlərdə  təkcə respublikamızda  deyil, İttifaq miqyasında tanınmış  mədəniyyət və incəsənət xadimləri,  yazıçı və şairlər  iştirak edərdilər.   

Yazıçı və şairlər  Anar, Nəriman Həsənzadə, Hüseyn Arif,  Əzizə Cəfərzadə, Mirvarid Dilbazi, Cəmil Əlibəyov, Tofiq Bayram, Nüsrət Kəsəmənli və başqaları  ilə keçirilən görüşlər, onunlarla söhbətlərimiz “Gəncənin səsi” qəzetinin o vaxtkı səhifələrində “yaşayır”.                                

Bəstəkar Fikrət Əmirovla  görüşüm  də həmin o illərə təsadüf edir.             

Qəzetin redaktoru, rəhmətlik Sabir Hacıyev  çağırıb, dedi  ki, bəstəkar Fikrət Əmirov şəhərimizin qonağıdır, şəhərdə  aparılan yenidənqurma və abadlaşdırma işləri ilə tanış olur. Birinci katib Həsən Həsənov tapşırıq verib ki,  onunla  görüşüb,  şəhərimiz haqqında, burada həyata keçirilən işlər barədə təəssüratlarını oxucularımızla bölüşək. Yerinə düşdüyü üçün  deyim ki, Həsən müəllimi  şəhərdə görülmüş  işlərlə bağlı  tərifdən daha çox  qonaqlarımızın istək,Ş arzu və təklifləri maraqlandırırdı.                                             

Qəzetimizin  foto-müxbiri  Rum Arıxovla  yollandıq   bəstəkarın “hüzuruna”.  Mən  söhbət aparıb, qeydlər etməli,  Arıxov da fotolar çəkməli  idi.        Gənc müxbir kimi  dünya şöhrətli  bəstəkarla söhbətimiz  çox maraqlı və yaddaqalan oldu və 40 ildən artıq vaxt  keçsə də bütün təfərrüatlar bu günkü kimi yadımdadı.                                                

Müsahibə hazır olduqdan  sonra  oxunması  üçün   birinci katibə təqdim edildi.   Qayda belə  idi, şəhərdə həyata  keçirilən işlərlə bağlı yazılanları  şəxsən birinci katib  özü oxuyurdu.   Özü də  həssaslıqla oxuyar, lazım bildiyi  düzəlişləri də  edirdi.  Jurnalistlər  yazdıqlarına  kənar  müdaxiləyə çox qısqanclıqla   yanaşarlar. Amma  Həsən Həsənovun  qeyd və düzəlişlərini təcrübəli jurnalistlər də  qəbul edirdilər.  Elə həssas əlavə və düzəlişlər edirdi ki, razılaşmamaq mümkün deyildi.   Təcrübəli partiya işçisi olsa da  redaktələrində təcrübəli redaktor səriştəsi hiss olunurdu.                                            

Qəzetin  redaktoru  Sabir Hacıyev  yazını katibin oxuması üçün apardıqdan bir qədər sonra qorkom  partiyadan  zəng gəldi. Dedilər Həsənov səni çağırır.         Mən otağa daxil olanda  müsahibə  əlində idi, hiss olunurdu ki, oxuyub, düzəlişlərini edib.                                                 

- Yazı  çap üçün hazırdır,  dedi,  - Söhbət zamanı    Fikrət müəllimə özünü şəhər qəzetinin müxbiri kimi təqdim etdinmi?                            

Sual məni çaşdırdı. Çünki  jurnalist kimi müsahibə almaq  üçün  artıq  məni təqdim etmişdilər. Belə incə məqama əhəmiyyət verməmişdim.  Cavabım birinci katibi  razı salmadı.                                             

- Fikrət müəllim  şəhər dəmiryol vağzalındadır, bir azdan qatar yola düşəcək, çalış çat, şəhər qəzetinin müxbiri kimi özünü  təqdim et.  Çatmasan Bakıya yollan.    Fikrət müəllimin, dünya   ölkələrinə   çoxsaylı  səfərləri  olur, qəzet və jurnallara,  radio və televiziyalara  müsahibələr verir.  Ola bilsin, sənin    müsahibəni oxumaq  fürsəti olmayacaq,  amma  Gəncənin şəhər qəzetinin müxbirinə  müsahibəsi  yadında qalsa, burada  görülmüş işləri  də söhbət düşəndə xatırlayacaq.                                                  

Sonra əlavə etdi ki, Gəncə respublikanın ikinci sənaye və  mədəniyyət mərkəzidir, burada ölkə mətbuatının çoxsaylı  bölgə müxbirləri  də fəaliyət göstərir.                                                 

Haqlı irad idi.                                            

Biz dəmiryol vağzalına çatanda, qatarın yola düşməsinə  çox   az  qalırdı.  Vağzalda qələbəlik idi,  gəncəlilər  öz dünya şöhrətli  həmyerlilərini  yola salmaq üçün gəlmişdilər.                                             

Nə qədər çətin olsa da bəstəkarla görüşmək imkanı tapdıq.  Bizi  sual dolu baxışlarla qarşıladı.                                            - 

Nəsə yaddan çıxıb- deyə sorşdu. Gəlişimizin səbəbini  biləndə gülümsündü:                                                 

Bu təəssüratları yazanda şəxsi foto-albomumda  görkəmli  bəstəkarla birgə çəkilmiş foto axtardım. 

Tapılmadı. Foto-müxbirin çəkdiyi çoxsaylı fotolardan   götürüb  o dahi insanla söhbətimizdən xatirə  kimi saxlamaq yadıma düşməyib. Görünür, bu da o vaxtkı gənclik təcrübəsizliyinin  nəticəsidir.                     

Çox təəssüf… 

Vaqif TANRIVERDİYEV                                                      

Gəncə.