Ötən həftə Azərbaycanın xarici işlər naziri Ceyhun Bayramov elan etmişdi ki, Ermənistanla sülh müqaviləsi layihəsində 17 maddə və preambula və 15 maddə üzrə, demək olar, mətnlər tam razılaşdırılıb:” Qalan 2 maddə üzrə açıq qalan suallarla bağlı işlər davam edir”.

Tərəflərin bir-birinə qarşı beynəlxalq iddialardan imtinası, Azərbaycana qarşı ərazi iddialarının əks olunduğu Ermənistan Konstitusiyanın dəyişdirilməsi , ATƏT-in de-fakto mövcud olmayan Minsk Qrupunun de-yure ləğv edilməsi, Bakının iki ölkə arasındakı sərhəd ərazilərdə üçüncü ölkə qüvvələrinin olmaması, daha dəqiq AB-nin müşahidəçilərinin bölgədən çıxarılması həmin razılaşdırılmış maddələr içərisindədir. Bu barədə tələbləri İrəvan dolayısı ilə yerinə yetirmək niyyətindədir. Bunu erməni mediası da təsdiq edir.
Hətta Ermənistanın "Hraparak" nəşri iddia edir ki, Paşinyan Azərbaycanın şərtlərini açıq şəkildə qəbul edib. Bir-birinə qarşı qaldırılan iddiaların geri götürülməsinə gəlincə, Ermənistanın baş naziri vurğulayıb ki, bu ideya Ermənistan üçün məqbuldur. Paşinyan ideyanın konstruktiv olduğunu vurğulayıb.

Adalet.az xəbər verir ki, Ermənistan parlamentində ”Hayastanum” fraksiyasının deputatı, daşnak İşxan Saqatelyan bu ideyanın Ermənistanın dövlətsizləşdirmə planının ifşa olunmasının daha bir sübutu hesab edib:” Hüquqlarımızın müdafiəsi variantlarından imtina etmək, beynəlxalq məhkəmələrdən iddiaları geri götürmək, ATƏT-in Minsk Qrupunun buraxılması, Ermənistan konstitusiyasının və Ermənistan ordusunun dəyişdirilməsi tələbləri sülhün bərqərar olmasına deyil, erməni amilinin və kimliyinin məhvinə yönəlib.
Azərbaycanlıların Ermənistana köçürülməsi proqramı ilə bağlı elanlar da bu məqsədin həyata keçirilməsi məntiqinin tərkib hissəsidir”.

Azərbaycana qarşı  barışmaz bir mövqe sərgiləyən erməni millətçisi və revanşisti qeyd edib ki, Nikol Paşinyanın danışıqlar masası arxasında dilə gətirməyə qorxduğu sadə həqiqətlər var:”Müxtəlif vaxtlarda Ermənistan ərazisində məskunlaşmış azərbaycanlıların geri qaytarılması məsələsini birbaşa soyqırım təhlükəsi altında  Qarabağdan  məcburi köçkün edilmiş soydaşlarımızın hüquqlarının bərpası məsələsi ilə eyniləşdirmək və eyniləşdirmək olmaz. Əgər Azərbaycan bu məsələni qaldırmaq istəyirsə, o zaman Bakıda və Sumqayıtda törədilən qırğınlar nəticəsində məcburi köçkün və qaçqın düşmüş ermənilərin hüquqları kontekstində müzakirə olunmalıdır.
Qarabağ ermənilərinin geri qayıtmaq hüququ və statusu erməni maraqlarını rəhbər tutan istənilən danışıqlar aparan şəxsin əsas və əsas gündəliyi olmalıdır.

Yalnız danışıqlarda Qarabağ məsələsinin aydın şəkildə irəli sürülməsi, hüquqlarımızın israrla qorunması Azərbaycanın yeni tələblərini və təcavüzünü cilovlaya bilər. Rəsmi Bakının səsləndirdiyi bəyanatlar bir daha sübut edir ki, Azərbaycanı güzəştlərlə sakitləşdirmək planının son nəticəsi ancaq yeni və daha sərt tələblər olacaq. Belə davam edərsə, Paşinyan 2026-cı ilə qədər Ermənistanı yeni fəlakətə aparacaq”.- deyə daşnak deputat  İşxan Saqatelyan bildirib.

Qeyd edək ki, Ermənistanın baş naziri Nikol Paşinyan “Armenpress”ə müsahibə verib. O müsahibəsində deyib ki, biz Ermənistan-Azərbaycan sərhədinin demarkasiya olunmuş hissələrinə üçüncü dövlətlərin qüvvələrinin yerləşdirilməməsi ilə bağlı müddəanın genişləndirilməsini təklif edirik:”Bu məntiqlidir, çünki demarkasiyadan dolayı bu hissələrdə eskalasiya riski minimuma endirilməsə də, əhəmiyyətli dərəcədə azalır.
Beləliklə, sərhədin tam demarkasiyası başa çatdıqdan sonra Ermənistan-Azərbaycan sərhədinin hər hansı bir hissəsində üçüncü qüvvələrin olmasına ehtiyac qalmayacaq və Ermənistan Respublikası bu məntiqi təklif edir”.

 Əntiqə Rəşid